Մարտի 1-ի գործով Քոչարյանը և Խաչատուրովը պետք է որպես մեղադրյալ ներգրավվեն
July 4, 2018Պայթյուն Մարտի 1-ի գործով: Հատուկ քննչական ծառայությունը նախօրեին տեղեկություն է տարածել այն մասին, որ Մարտի 1-ի գործով քննչական խումբը մեղադրանք է առաջադրել պաշտպանության նախկին նախարար Միքայել Հարությունյանին՝ սահմանադրական կարգը տապալելու, ապօրինի ռազմական դրություն հաստատելու, բանակը ներքին գործընթացների մեջ ներգրավելու համար: Հարուցված նոր քրեական գործում Մ. Հարությունյանը ներգրավվել է որպես մեղադրյալ: ՀՀ նախկին նախագահ Ռոբերտ Քոչարյանը կանչվել է հարցաքննության:
Թեմայի շուրջ «Առաջին լրատվական»– ի հետ զրույցում իրավապաշտպան Արթուր Սաքունցը նշեց. «Այս ամենը գնահատում եմ շատ տրամաբանական, այն լիովին համապատասխանում է թավշյա հեղափոխության արդյունքում Հայաստանում ստեղծված նոր իրավիճակին, այն է, որ իշխանությունները, Նիկոլ Փաշինյանի գլխավորությամբ, ըստ էության իրականացնում են արդարադատություն, օրենքի առջև բոլորին հավասար պատասխանատվության ակզբունքը, որի մասին բազմիցս ՀՀ վարչապետը հայտարարում էր, իրականություն է դառնում, և հատկապես այնպիսի մի կարևոր խնդրի հետ կապված, ինչպիսին, իմ որակմամբ, պետական ահաբեկչությունն է ՀՀ քաղաքացիների նկատմամբ: Մի կարևոր ամրագրում նշենք. խոսքը սահմանադրական կարգը բռնի տապալելու մասին է, և երկրորդ՝ Մ. Հարությունյանի և այլ անձանց մասնակցությամբ է տեղի ունեցել:
Տվյալ դեպքում այս նոր քրեական գործը՝ նոր հոդվածի առաջադրմամբ՝ գալիս է հիմքեր ստեղծելու, որպեսզի Մարտի 1-ի ոճրագործության փաստով իրապես քննություն իրականացվի, առնվազն 10 հոգի, որոնք սպանվեցին Մարտի 1-ին, այդ ահաբեկչության հետևանքներն էին, ոչ թե բուն պատճառը: Ըստ էության՝ 10 տարվա ընթացքում Դատախազությունը և Հատուկ քննչական ծառայությունը քայլ չէին կատարել Մարտի 1-ի պետական ահաբեկչության քննության ուղղությամբ: Իսկ հիմա, երկու ամսվա ընթացքում նոր իշխանության առկայությամբ, ըստ էության, տեղի ունեցավ քայլ, սա խոսում է քաղաքական կամքի առկայության մասին և երկրորդ՝ ի վերջո Հայաստանում արդարադատության իրականացման համար պատշաճ պայմաններ են ստեղծվել»
Շարունակությունը՝ տեսանյութում