Արման Թաթոյանը նշանակվելու է ՄԻՊ՝ Սահմանադրության երկու դրույթի կոպիտ խախտումով. իրավապաշտպաններ
February 8, 2016Իրավապաշտպանները միանշանակ չեն ընդունում իշխանության կողմից Մարդու իրավունքների պաշտպանի թափուր տեղի համար առաջադրված թեկնածուին՝ Արման Թաթոյանին, որը մինչ այս պահը արդարադատության նախարարի տեղակալն է և կառավարության ներկայացուցիչը Մարդու իրավունքների եվրոպական դատարանում։
Իրավապաշտպան Արթուր Սաքունցի խոսքերով՝ առաջադրելով Արման Թաթոյանի թեկնածությունը, իշխանությունը երկու կոպիտ սխալ է թույլ տալիս։ Նախ ոտնահարում է իր իսկ ջանքերով ընդունված սահմանադրության համապատասխան դրույթը, ապա նաև այն, որ օմբուդսմենի թեկնածուի հարցը պետք է քննարկեր և առաջադրեր ԱԺ Մարդու իրավունքների, այլ ոչ թե պետաիրավական հանձնաժողովը։
Բացի այդ, իրավապաշտպանի դիտարկմամբ, եթե ուսումնասիրելու լինենք աշխարհի փորձը, ապա ոչ մի երկրում չենք հանդիպի, որ ՄԻՊ նշանակվի մի անձ, որը երբևէ կառավարության մաս է կազմել, կամ շփումների մեջ է եղել իշխանությունների հետ։
Արդարադատության փոխնախարարի թեկնածության առաջադրումը, ըստ Ժաննա Ալեքսանյանի էլ, գալիս է ապացուցելու, որ իշխանությանը պետք չէ անկախ, ինքնուրույն օմբուդսմեն, որը կարող է բարձրաձայնել տարբեր ոլորտներում առկա խնդիրների մասին, իշխանությունների քիմքին ոչ հաճելի զեկույցներ հրապարակել։
Իրավապաշտպանները համոզված փաստում են՝ իշխանության կողմից Օմբուդսմենի ինստիտուտի նկատմամբ նման վերաբերմունքը, նման թեկնածուն կարող է Օմբուդսմենի ինստիտուտի նկատմամբ հանրային վստահության նվազման պատճառ դառնալ, որը նոր մարտահրավեր կարող է լինել։ Մինչդեռ, այսօր Հայաստանին անհրաժեշտ է այնպիսի օմբուդսմեն, որը չի վախենա հայատարարել, որ երկրում քաղբանտարկյալներ կան, որը չի հապաղի գնալ ՔԿՀ և արձանագրել Գևորգ Սաֆարյանի նկատմամբ իրականացվող բռնությունները և բարձրաձայնել ոստիկանական ապօրինությունների մասին։
Նշենք, որ բացի Արման Թաթոյանից, օմբուդսմենի պաշտոնի համար պայքարելու են նաև Զարուհի Փոստանջյանը, ԲՀԿ-ի թեկնածու Մակար Եղիազարյանը։