Գեներալ Մանվելին կարելի է գնալ և տեսնել՝ պարզելու համար նրան խոշտանգե՞լ են, թե՝ ոչ․ խորհուրդ Արթուր Սաքունցից
June 25, 2018ՀՔԱ Վանաձորի գրասենյակի նախագահ Արթուր Սաքունցի խոսքով՝ Հայաստանում խոշտանգման դեպքերի բացահայտման ուղղությամբ ակտիվ աշխատանք է իրականացնում քաղաքացիական հասարակությունը «Եվրոպայի խոշտանգումների կոմիտեի» հետ համատեղ, իսկ արձանագրված արդունքները բարձրաձայնում են բանակում, ոստիկանական տարբեր բաժիններում, այլ ուժային կառույցներում կատարվող խոշտանգումների մասին:
«Խոշտանգումների փաստերի վերաբերյալ, օրինակ, Հատուկ քննչական ծառայությունը պետք է ունենա փաստերը հավաքագրելու մեխանիզմ, որը չունի, կարևոր են այստեղ նաև քննչական գործողությունների տեսաձայնագրությունները, որոնք էլ հետաձգվում են հաճախ՝ ֆինանսական պատճառներով»,- այսօր կազմակերպված՝ «Խոշտանգումներից և անմարդկային կամ արժանապատվությունը նվաստացնող վերաբերմունքից զերծ մնալու իրավունքի խախտումները Հայաստանում և պաշտպանության հարցերը» թեմայով հանրային քննարկման ժամանակ ասաց Արթուր Սաքունցը։
Խոսելով ««Եվրոպայի խոշտանգումների կոմիտեի» արձանագրած խոշտանգման կամ բռնության դեպքերի մասին՝ նա ասաց, որ կոմիտեն մտահոգություն է հայտնել լրագրողների նկատմամբ բռնությունների գործով ոչ պատշաճ քննությունների վերաբերյալ։ Առանձին ուշադրություն է դարձվում նաև կալանավորված անձանց պահման վայրեր դիտորդական խմբերի այցերին։
«Ես հորդորում եմ լրագրողներին ակտիվ լինել, կալանավայրեր այցելել, հանդիպել կալանավորված անձանց հետ և ապահովել թափանցիկություն՝ փակ համակարգերում մարդու իրավունքների պաշտպանության մասով։ Կարելի է, օրինակ, դիմել Արդարադատության նախարարությանը՝ գնալ և հանդիպել գեներալ Մանվելի հետ, և տեսնել ինչպես է նրա նկատմամբ վերաբերմունքը, խոշտանգումների մասին լուրերը փարատել»,- ասաց նա։ Մանրամասները՝ տեսանյութում։