Ամբաստանյալի պաշտպանը չէր ներկայացել 2 տարեկան 3 ամսական Լիա Միսակյանի մահվան գործի քննությանը
18:19, June 2, 2017 | Նորություններ, Սեփական լրատվություն
Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում 2 տարեկան 3 ամսական Լիա Միսակյանի մահվան գործի քննությունն այսօր չկայացավ:
Ամբաստանյալ Զարինե Այվազյանի պաշտպան Երեմ Սարգսյանը սեմինարի մասնակցության պատճառով չէր ներկայացել նիստին, և գրավոր դիմում էր ներկայացրել նիստը հետաձգելու մասին:
Հիշեցնենք՝ ՀՀ Վճռաբեկ դատարանի կողմից տուժող կողմի բողոքի հիման վրա ստորադաս դատարանների դատական ակտերը բեկանելուց հետո գործը լրացուցիչ պատժի նշանակման մասով ուղարկվել էր ՀՀ Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան` նոր քննության:
Նախորդ դատական նիստին ամբաստանյալ Զ. Այվազյանի պաշտպան Ե. Սարգսյանը միջնորդեց դիմել Սահմանադրական դատարան՝ ՀՀ Քրեական դատավարության օրենսգրքի 419-րդ հոդվածի սահմանադրականությունը վիճարկելու նպատակով: Միջնորդությունը հիմնավորեց նրանով, որ իր կարծիքով, դատարանը սահմանափակված է Վճռաբեկ դատարանի վճռով, քանի որ համաձայն վերոնշյալ հոդվածի՝ գործը պետք է քննի ՀՀ Վճռաբեկ դատարանի սահմանած ծավալով:
Տուժողի իրավահաջորդի ներկայացուցիչ, ՀՔԱ Վանաձորի գրասենյակի Երևանի ներկայացուցչության իրավաբան Տաթևիկ Սիրադեղյանը և մեղադրող դատախազը առարկեցին: Դատարանը մերժեց միջնորդությունը: