0 8000 12 11

2017 թ. ապրիլի 27-ին ՀՀ Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում, նախագահությամբ՝ դատավոր Մ.Մելքոնյանի, շարունակվեց 2013 թ. հունվարի 2-ին «Արաբկիր» բժշկական կենտրոնում մահացած 2 տարեկան, 3 ամսական Լիա Միսակյանի գործի քննությունը:

Դատական նիստին ներկա էին ՀՀ քրեական օրենսգրքի 130-րդ հոդվածի 2-րդ մասով մեղադրվող ամբաստանյալներ Լ. Վարդանյանը և Զ. Այվազյանը, վերջիններիս պաշտպաններ Գիվի Հովհաննիսյանն ու Ե. Սարգսյանը, մեղադրող Մ. Շահգալդյանը, տուժողի իրավահաջորդ Գ. Միսակյանն ու վերջինիս ներկայացուցիչ, ՀՔԱ Վանաձորի գրասենյակի Երևանի ներկայացուցչության իրավաբան Տ. Սիրադեղյանը:

Նախագահող դատավոր Մ. Մելքոնյանը հիշեցերեց, որ նախորդ դատական նիստը հետաձգվել էր պաշտպան Ե. Սարգսյանին դատարան ինքնաբացարկի միջնորդություններկայացնելու հնարավորություն տալու նպատակով:

Մինչ ինքնաբացարկի միջնորդություն ներկայացնելը՝ Ե. Սարգսյանը միջնորդություն ներկայացրեց գործով կիրառման ենթակա նորմի սահմանադրականությունը որոշելու համար ՀՀ Սահմանադրական դատարան դիմելու վերաբերյալ: Միջնորդությունը հիմնավորեց նրանով, որ ՀՀ Վճռաբեկ դատարանի կողմից կայացված դատական ակտում տրված մեկնաբանությունները պարտադիր են դատարանի համար, և այդ իրավիճակում դատարանը չի կարող լինել օբյեկտիվ ու անաչառ, քանի որ համաձայն ՀՀ Քրեական դատավարության օրենսգրքի 419-րդ հոդվածի՝ գործը պետք է քննի ՀՀ Վճռաբեկ դատարանի սահմանած ծավալով: Պաշտպանի կարծիքով՝ վճռաբեկ դատարանը պարտավոր էր զերծ մնալ այդ մասով վերջնական գնահատական տալուց, որպեսզի նոր քննության ընթացքում դատարանին չկաշկանդեր իր հետևություններով, և պնդեց, որ ՀՀ Քրեական դատավարության օրենսգրքի 419-րդ հոդվածի վերաբերյալ ՀՀ Վճռաբեկ դատարանի մեկնաբանությունը հակասում է  ՀՀ Սահմանադրության 63-րդ հոդվածին՝ միջնորդելով դիմել ՀՀ Սահմանադրական դատարան՝ այդ նորմի վերաբերյալ իրավակիրառ պրակտիկայում տրված մեկնաբանությունը ՀՀ Սահմանադրությանը համապատասխանությունը պարզելու համար:

Մեղադրողն առարկեց միջնորդության դեմ՝ դիրքորոշում հայտնելով այն մասին, որ դատարանն ամենևին կաշկանդված չէ ՀՀ Վճռաբեկ դատարանի որոշմամբ, և ՀՀ Սահմանադրական դատարան դիմելու կարիք չկա:

Տուժողի իրավահաջորդի ներկայացուցիչ Տ. Սիրադեղյանն էլ դրանում դատաքննությունը ձգձգելու միտում տեսավ՝ նշելով, որ միջնորդության առաջին մասը պարունակում է ինքնաբացարկի միջնորդության հիմքեր, սակայն միջնորդության եզրափակիչ մասը մեկ այլ պահանջ է նախատեսում: Ապա նշեց, որ պաշտպանն իր միջնորդությամբ Վճռաբեկ դատարանի միայն մի քանի կետերի է անդրադառնում, մինչդեռ այն պետք է գնահատել համակարգված բովանդակությամբ, և պնդեց, որ այդ որոշումը որևէ կերպ չի սահմանափակում ընդհանուր իրավասության դատարանին անկախ, անաչառ գործի քննություն իրականացնելու հարցում, քանի որ գործի նոր քննության ծավալը դատարանին չի կաշկանդում ընդունելու կողմերի ներկայացրած ապացույցները:

Տ. Սիրադեղյանը հավելեց, որ միջնորդությամբ վկայակոչվել են դեռևս ուժի մեջ չմտած ՀՀ Սահմանադրության դրույթները: Բացի դրանից՝ ՀՀ Սահմանադրական դատարան դիմելու իրավունքը պատկանում է դատարանին, և դատարանը կարող է դիմել ՀՀ Սահմանադրական դատարան իր կողից քննվող գործով կիրառվող իրավական նորմերի սահմանադրականության հարցով, մինչդեռ, պաշտպանի կողմից վկայակոչվել են ՀՀ Վճռաբեկ դատարանի լիազորությունները սահմանող դրույթները, որոնք որևէ կերպ չեն կարող կիրառվել այս գործի քննության շրջանակներում, ուստի՝ խնդրեց մերժել միջնորդությունը:

Ամբաստանյալ Լ. Վարդանյանի պաշտպան Գ. Հովհաննիսյանը կարծիք հայտնեց, որ ՀՀ Վճռաբեկ դատարանի որոշումից բխում է, որ ձևական դատաքննություն է ընթանալու, քանի որ սահմանվել են քննության ծավալները: Նա գտավ, որ միջնորդությունը հիմնավոր է և ենթակա է բավարարման:

Կողմերի փաստարկների վերաբերյալ պաշտպան Ե. Սարգսյանի դիրքորոշումը լսելուց հետո դատարանը հեռացավ խորհրդակցական սենյակ՝ որոշում կայացնելու:

Հրապարակված որոշմամբ դատարանը մերժեց ներկայացված միջնորդությունը:

Հաջորդ դատական նիստը կկայանա 2017 թ. հունիսի 2-ին՝ ժամը 15:00-ին:

Տես նաև՝ ՄԻԵԴ-ը կքննի երկու տարեկան, երեք ամսական Լիա Միսակյանի մահվան գործը