Ապագան առանց խտրականության
00:00, March 22, 2007 | Քննարկումներ | Խտրականության արգելումՄարտի 21-ին ՀՔԱ Վանաձորի գրասենյակը կազմակերպել էր «Ապագան առանց խտրականության» խորագրով սեմինար-քննարկում՝ նվիրված Ռասայական խտրականության վերացման միջազգային օրվան: Սեմինարին մասնակցում էին Վանաձոր քաղաքի հանրակրթական դպրոցների թվով 20 աշակերտներ և ՀՔԱ Վանաձորի գրասենյակի կամավորներ:
Միջոցառման խորագրիը պատահականորեն չէր ընտրված: Այսօր, երբ աշխարհի տարբեր հատվածներում շարունակվում են ազգային, էթնիկական, կրոնական հողի վրա կատարվող հանցագործություններն, ու դեռևս կենսունակ են ռասայական գերազանցության վրա հիմնված հայացքները, քաղաքական արդիականություն ունի խտրականության բոլոր ձևերից ազատ հանրության ստեղծման խնդիրը: Իսկ այդ ճանապարհին կարևոր և ելակետային նշանակություն ունի հասարակությանը, և հատկապես երիտասարդությանը իրազեկ դարձնել ռասայական խտրականության բոլոր ձևերի ու դրանց հետևանքների մասին: Այս է պատճառը, որ սեմինարին հրավիրել էինք հանրակրթական դպրոցների բարձր դասարանների աշակերտներին:
Տե°ս հաշվետվությունը (անգլերեն լեզվով) (pdf 2.49 mb)
Սեմինարը բացեց ՀՔԱ Վանաձորի գրասենյակի խաղաղասիրական և տարածաշրջանային ծրագրերի մասնագետ Արմինե Սադիկյանը, որը, ողջունելով մասնակիցներին, ներկայացրեց սեմինարի նպատակները՝ շեշտելով, որ այն իրականացվում է UNITED համաեվրոպական ցանցի ակցիաների շրջանակներում: Սեմինարը վարում էր ՀՔԱ Վանաձորի Գրասենյակի խաղաղասիրական բաժնի կամավոր Մարիաննա Ղահրամանյանը: Այն սկսվեց «Նավաբեկություն» ինտերակտիվ խաղով, որի նպատակն էր բացահայտել սեմինարի մասնակիցների պատկերացումներն ու մոտեցումները քննարկվող թեմայի վերաբերյալ: Այնուհետև շարադրվեց սեմինարի բուն նյութը՝ միաժամանակ վերլուծելով ու քննարկելով խաղի արդյունքները:
Մասնակիցներին բացատրվեց «խտրականություն» հասկացությունը, ներկայացվեց Ռասայական խտրականության բոլոր ձևերի վերացման միջազգային Կոնվենցիան, խոսվեց ռասիզմի, դրա ավանդական ու ժամանակակից թաքնված դրսևորումների, հասարակության մեջ առկա բազմազանությունը գիտակցականորեն ընկալելու ու մեր և մյուսների միջև տարբերություններիը որպես սպառնալիք չընդունելու, այլ նրանց հարգելու ու հասկանալու անհրաժեշտության մասին: Աշակերտներին ներկայացվեց նաև ՀՔԱ Վանաձորի Գրասենյակի նախորդ տարիների իրականացրած միջոցառումները, ցուցադրվեց դրանց մասին պատմող ֆիլմ և մասնակիցներին առաջարկվեց ռասիզմի ու ռասայական խտրականության դեմ պայքարող ժողովուրդների հետ համերաշխության շաբաթվա շրջանակներում համագործակցելով իրենց հասակակիցների հետ՝ հանդես գալ սեփական նախաձեռնությամբ: Վերջում նրանց բաժանվեցին ինֆորմացիոն փաթեթներ: