Արթուր Սաքունց. «Զարուհի Փոստանջյանին ԵԽԽՎ-ում հայկական պատվիրակության կազմից հեռացնելը քաղաքական հետապնդում է» (Տեսանյութ)
06:34, October 8, 2013 | Նորություններ | Ազատության և անձնական անձեռնմխելիության իրավունք, Անձնական և ընտանեկան կյանքը հարգելու իրավունք, Խոշտանգումներից և անմարդկային կամ արժանապատվությունը նվաստացնող վերաբերմունքից զերծ մնալու իրավունք
«ԱԺ նախագահն իրավունք չուներ Զարուհի Փոստանջյանին հեռացնելու ԵԽԽՎ հայաստանյան պատվիրակության կազմից»,-Aravot.am-ին ասաց ՀՔԱ Վանաձորի գրասենյակի ղեկավար Արթուր Սաքունցը: Շարունակելով միտքը, նա ասաց. «Հովիկ Աբրահամյանը նույնպիսի պատգամավոր է, ինչպես Զարուհին է: Երկուսի մանդատն էլ սկզբից նույնն են:
Պատվիրակությունը ձևավորվում է քաղաքական ուժերի կողմից` նրանց ներկայացրած թեկնածության հիման վրա: Ուստի պատվիրակության կազմը ի սկզբանե հաստատված է»: Պատվիրակության կազմից Զ. Փոստանջյանի հեռացումը` ԵԽԽՎ-ում նրա բարձրացրած հարցից հետո, Արթուր Սաքունցը համարում է «քաղաքական հետապնդում»: Այս առիթով նա ասաց. «Այս տեսանկյունից ընդդիմադիր կուսակցության ներկայացուցչի կամ քաղաքական գործչի նկատմամբ նման մոտեցումը և հայտարարությունը պատվիրակության կազմից հեռացնելու մասին, հանդիսանում է Զարուհի Փոստանջյանի կարծիքի և քաղաքական դիրքորոշման նկատմամբ հետապնդման և սաստման փորձ, ինչը անհամատեղելի է ԵԽ անդամ երկրի համար»:
Հետաքրքվեցինք` հիմա է՞լ Արթուր Սաքունցը ունի մտահոգություններ Զ. Փոստանջյանի անվտանգության հետ կապված, քանի որ նրա ժամանման օրվա առնչությամբ նա նման մտահոգություն էր հայտնել: Պարոն Սաքունցը պատասխանեց. «Լրատվամիջոցներով տեսա ռազմահայրենասիրական ուժերի կողմից Զարուհուն լոլիկներով, ձվերով դիմավորելու փորձ»: Մեր այն դիտարկմանը, թե նման բան տեղի չունեցավ, Արթուր Սաքունցն այսպես արձագանքեց. «Եթե քաղաքական ակտիվիստներն ու նախաձեռնությունը չհայտարարեինք, որ մենք էլ ենք գնալու օդանավակայան Զարուհուն հնարավոր ոտնձգություններից պաշտպանելու, կարող է և լինեին: Այս տեսակետից նախագահական ինստիտուտը խելամիտ գտնվեց, երբ հրապարակային հայտնեց, որ նման ակցիաները չեն ողջունում: Հակառակ դեպքում օդանավակայանում խայտառակ իրավիճակ կլիներ»:
Ա. Սաքունցը երևույթը կապում է մեկ այլ փաստի հետ. «Գալուստ Սահակյանը հայտարարեց, որ իբր երիտասարդները ինքնաբուխ են նման ակցիաներ անում: Հիմա ականատես եղանք, որ այդ ինքնաբուխ ակցիաները կարող են կասեցվել նախագահական ինստիտուտի կողմից, որ այդ բոլոր ռազմահայրենասիրական ինքնաբուխ ակցիաները կամ ձևավորվում, կամ առաջ են գալիս նախագահական ինստիտուտի կողմից: Ինքնաբուխ ակցիա` որպես այդպիսին չկա, դրանք կառավարելի են: Մի հոգի գոնե չերևաց օդանավակայանում, որը կարող էր այլ արտահայտություն թույլ տալ: Այդպիսի տոտալ կառավարում ինքնաբուխների վարքագծի նկատմամբ, ինձ համար ապշեցուցիչ է: Սակայն օդանավակայանում տարբեր հնարավոր տեղերում հասարակական կարգի պահպանման իրենց գործառույթն էին իրականացնում ոստիկանները: Այսինքն` հստակ հրահանգված էր կասեցնել բոլոր հնարավոր միջադեպերը»:
Աղբյուրը` http://www.aravot.am/2013/10/07/393661/