Արթուր Սաքունց. ՊՆ ի վիճակի չէ իր վերահսկողության տակ վերցնել բանակում հաստատված ոչ կանոնակարգային հարաբերությունները
00:00, July 29, 2011 | Նորություններ | Զինծառայողների/Զորակոչիկների իրավունքներ, Կյանքի իրավունք | Զինված ուժեր
Հայաստանի Պաշտպանության նախարությունն ի վիճակի չէ իր վերահսկողության տակ վերցնել բանակում հաստատված ոչ կանոնակարգային հարաբերությունները, այնինչ Պնախարարը պատասխանատու է բանակում խաղաղ պայմաններում զոհված յուրաքանչյուր զինվորի կյանքի համար։
Հուլիսի 29-ին տեղի ունեցած մամուլի ասուլիսի ժամանակ այս մասին հայտարարեց Հելիսնկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցը։
Նրա խոսքով, 2010 թվականին իրենց գրասենյակի կողմից իրականացած ուսումնասիրությունների արդյունքում բացահայտվել են բանակում մահացության 44 դեպքեր, սակայն իրականում Պաշտպանության նախարարությունն ԱՄՆ պետքարտուղարությանը հայտնել էր 54 դեպքի մասին։ «Այսինքն՝ 10 մահացության դեպքերի վերաբերյալ հրապարակային որեւէ հաղորդագրություն՝ թե՛ ՊՆ եւ թե՛ լրատվամիջոցների կողմից չի եղել։ 10 դեպքի տարբերությունը խոսում է նաեւ այն մասին, որ իրենց հերթին միջադեպերի մասին չեն ահազանգել մահացածների ծնողները։ Ընդ որում, հատկանշական է, որ մահացած զինվորների անձնական տվյալները ՊՆ համարում է պետական գաղտնիք, գոնե Հայաստանի համար, սակայն չգիտես ինչու այդ տվյալներն ազատերոն տրամադրում է ԱՄՆ պետքարտուղարությանը»,- տարակուսանք հայտնեց Սաքունցը։
Հելիսնկյան Քաղաքացիական Ասամբլեայի Վանաձորի գրասենյակի ղեկավարի համոզմամբ, ՊՆ պարտավոր է հրապարակել բանակում կատարված բոլոր միջադեպերը, ավելին, յուրաքանչյուր դեպքի վերաբերյալ քննչական գործողությունների մասին տեղյակ պահել հանրությանը։ «Բանակում ոչ կանոնակարգային հարաբերությունների եւ հրադադարի ռեժիմի խախտման հետեւանքով 44 մահվան դեպքերով գործ հարուցվել է 15-ի դեպքով, 2 գործ փակվել է, եւս 10-ը նախաքննության փուլում է։ Հատկանշական է, սակայն, որ շատ դեպքերում տուժած զինծառայողների ընտանիքները չեն տեղեկացվում անգամ նախաքննական մարմինների իրականացած աշխատանքների ընթացքին։ Շատ դեպքերում նախաքննությունները շարունակվում են իրականությունը եւ բուն հանցագործությունը կոծկելու, հանցագործներին հովանավորելու նպատակով»,- նկատեց իրավապաշտպանը։
Ամփոփելով՝ Արթուր Սաքունցը անդրադարձ կատարեց նաեւ այն իրողությանը, որ ընդամենը 3-4 տարի առաջ երիտասարդներին զորակոչվելու համար ոչ պիտանի հայտարարող հիվանդություններից շատերը, օրինակ, երրորդ աստիճանի հարթաթաթությունը, հանվել են հիվանդությունների ցուցակից, եւ այժմ բանակ են զորակոչվում ինչպես հարթաթաթ, այնպես էլ մտավոր, տեսողական եւ այլ խնդիրներ ունեցող երիտասարդները։
Աղբյուրը՝ http://news.am/arm/news/69517.html