Բացատրում են, թե բերման ենթարկվածն ինքն է իրեն վնասել
00:00, March 28, 2009 | Նորություններ | Խոշտանգումներից և անմարդկային կամ արժանապատվությունը նվաստացնող վերաբերմունքից զերծ մնալու իրավունքՊարզվում է, որ «Վանաձոր» քրեակատարողական հիմնարկ մարմնական վնասվածքներով տեղափոխված Արթուր Վարդումյանն ինքն է իրեն վնասել ոստիկանության Վանաձորի բաժնում հարցաքննության ժամանակ:
«Ոստիկանության Վանաձորի բաժնում անձնական խուզարկության ժամանակ մեղադրյալ Արթուր Վարդումյանը գլխով հարվածել է գրասեղանին և սենյակի պատին և ստացել բազմաթիվ վնասվածքներ, քերծվածքներ»,- այսպես է տեղեկացնում Լոռու մարզի քննչական բաժինը:
2009թ-ի փետրվարի 20-ին «Վանաձոր» ՔԿՀ այցելության ժամանակ կալանավոր Ա. Վարդումյանը ՀՀ արդարադատության նախարարության հասարակական դիտորդական խմբի անդամներ Էդմոն Մարուքյանին և Արթուր Սաքունցին հայտնել է, որ ոստիկանության Վանաձորի բաժնի աշխատակիցների կողմից 2009 թվականի փետրվարի 9-ին դաժան ծեծի է ենթարկվել: Արթուր Վարդումյանի մարմնի վրա հայտնաբերված վնասվածքների վերաբերյալ համապատասխան նշում է կատարվել նաև «Վանաձոր» քրեակատարողական հիմնարկի կալանավորված անձանց ընդունման զննության մատյանում:
Այս փաստի կապակցությամբ Հելսինկյան Քաղաքացիական Ասամբլեայի Վանաձորի գրասենյակի կողմից հաղորդում է ներկայացվել ՀՀ Գլխավոր դատախազություն: Ի պատասխան ներկայացված հաղորդմանը` ՀՀ Ոստիկանության քննչական գլխավոր վարչության Լոռու մարզի քննչական բաժինը պարզել է, որ Արթուր Վարդումյանին ոչ թե ծեծել են, այլ վերջինս ինքն է իրեն վնասել:
Փաստորեն, ոստիկանության աշխատակիցների կողմից քաղաքացու նկատմամբ կիրառված բռնության հետքեր չեն հայտանաբերվել, և քրեական գործի հարուցումը մերժվել է:
Ներկայացված հաղորդման կապակցությամբ, սակայն, ՀՀ ոստիկանության քննչական գլխավոր վարչության Լոռու մարզի քննչական բաժնի կողմից քրեական գործի հարուցումը մերժելու մասին պատճառաբանված որոշում չի ներկայացվել կազմակերպությանը` ՀՀ Քրեական դատավարությամբ սահմանված կարգով:
ՀՔԱ Վանաձորի գրասենյակը պատրաստվում է ստանալ քրեական գործի հարուցումը մերժելու մասին պատճառաբանված որոշումը, այնուհետև բողոքարկել այն վերադասության կամ դատական կարգով: