Բողոքի ակցիայի մասնակիցները երթով շարժվեցին ոստիկանություն` Վարդգես Գասպարիի ետևից
00:00, October 20, 2011 | Նորություններ | Ազատության և անձնական անձեռնմխելիության իրավունք, Զինծառայողների/Զորակոչիկների իրավունքներ, Հավաքների և միավորումների ազատություն | Զինված ուժեր, Ոստիկանություն
Արդեն մեկ ժամ է, ինչ բանակում անօրինությունների դեմ բողոքող մարդիկ գտնվում են նախագահական նստավայրի դիմացի մայթին: Արդեն հեռվից նախագահականի մոտ երևում են ոստիկանական տարբեր ստորաբաժանումների տասնյակ ոստիկաններ, ովքեր ձեռք-ձեռքի բռնած, ակցիայի մասնակիցներին թույլ չեն տալիս անցնել նախագահի նստավայրի մոտ և ակցիան շարունակել հենց նստավայրի առջև:
Ակցիայի մասնակիցներից միայն իրավապաշտպան Արթուր Սաքունցը, «Ասպարեզ» ակումբի նախագահ Լևոն Բարսեղյանը և մի քանի լրագրողներ անցան փողոցը, սակայն նախագահական նստավայրը պաշտպանող թև-թևի տված ոստիկանները նույնիսկ թույլ չէին տալիս անցորդներն անցնեն Բաղրամյան պողոտայով:
Այս պահին էլ ակցիան շարունակվում է նախագահական նստավայրի դիմացի մայթին: Նշենք նաև, որ ոստիկանները հաշվի չառան որդեկորույս մայրերին և քաշքշուկ կազմակերպեցին այն պահին, երբ նրանք ցանկանում էին անցնել փողոցը:
Տեղեկացնենք, որ մեկ ժամ առաջ Վարդգես Գասպարիին կառավարության շենքի մոտից բռնի ուժով տարան ոստիկանության բաժանմունք, ինչը ոստիկանները պատճառաբանեցին Գասպարիի կողմից կատարված վարչական խախտումով:
Հենց նոր տեղեկացանք, որ ակցիայի մասնակիցները երթով նախագահականից շարժվեցին դեպի Կենտրոնի ոստիկանական բաժանմունք՝ իմանալու Գասպարիի հետ կապված մանրամասները: Նրանք կմնան այնտեղ՝ մինչև Գասպարին ազատ արձակվի: