Ինչ է սպասվում «գազային» համաձայնագրերին ՍԴ-ում. կարծիքներ
12:30, December 27, 2013 | Այլ լրատվամիջոցներ, ՆորություններՕրենքի խախտմամբ ընդունված իրավական ակտը հիմք է հանդիսանում Սահմանադրությանը հակասող և անվավեր ճանաչելու համար: Նման կարծիք Tert.am-ի հետ զրույցում հայտնեց իրավապաշտպան Արտակ Զեյնալյանը՝ անդրադառնալով դեկտեմբերի 26-ին Ազգային ժողովի հաշվիչ հանձնաժողովի ոչ կոալիցիոն 4 ուժերի կողմից «գազային» երեք համաձայնագրերիվավերացման մասին որոշման քվեարկությունը անվավեր ճանաչելու և այդ կապակցությամբ Սահմանադրական դատարան դիմելու նրանց որոշմանը:
«ԱԺ-ի որոշում կլինի, թե օրենք, դա Սահմանադրությանը հակասում է և անվավեր կճանաչվի, եթե ընդունվել է օրենքի խախտմամբ»,- ասաց նա՝ միաժամանակ ընդգծելով, որ վերջնական տեսակետ կարող է հատնել հարցի շուրջ, երբ ծանոթանա ոչ կոալիցիոն ուժերի ՍԴ դիմելու փաստարկներին:
Հիշեցնենք, որ դեկտեմբերի 23-ին տեղի ունեցած Ազգային ժողովի արտահերթ նիստին, որտեղ քննարկվում էր «ՀայՌուսգազարդ» փակ բաժնետիրական ընկերության բաժնետոմսերի առքուվաճառքի և հետագա գործունեության պայմանների մասին» համաձայնագրի վավերացման հարցը, պատգամավորներն ստիպված եղան քվեարկել ձեռքերը բարձրացնելու միջոցով, քանի որ «Ժառանգություն» խմբակցության պատգամավոր Զարուհի Փոստանջյանը հավաքել էր «Հանրապետական» խմբակցության մի շարք պատգամավորների էլեկտրոնային քվեարկության քարտերը:
Հաշվիչ հանձնաժողովի 4 անդամներն անօրինական են համարում «գազային» պայմանագրերի քվեարկությունը՝ նշելով, որ հանձնաժողովի նախագահ Սուքիաս Ավետիսյանը խախտել է ԱԺ կանոնակարգ օրենքը և առանց հանձնաժողովի միայնակ է կատարել քվեարկության հաշվարկը:
Իրավապաշտպան Արթուր Սաքունցը ևս նշեց, որ ՍԴ դիմելու փաստարկներին ծանոթանալուց հետո կարող է եզրակացություն տալ, ավելին՝ կասկածում է, թե ընթացակարգի խախտման հետ կապված դիմումը ՍԴ-ի քննության առարկա կարող է հանդիսանալ, թե՝ ոչ։
Մինչդեռ նա, ելնելով ոչ կոալիցիոն ուժերի հայտարարություններից, նույնպես այն տեսակետին է, որ քվեարկությունը տեղի է ունեցել ԱԺ կանոնակարգ օրենքի խախտմամբ։
«Այդ հայտարարությունները խոսում են միանշանակ, որ խախտումներ են տեղի ունեցել: Ես համոզված եմ և պնդում եմ, որ ընթացակարգային խախտում է տեղի ունեցել, որովհետև քվեարկության արդյունքների ամփոփման վերաբերյալ հաշվիչ հանձնաժողովի որոշումը չկա, որի հիման վրա ԱԺ նախագահը հայտարարի քվեարկության արդյունքների մասին, որովհետև դա խայտառակություն է, երբ մի դեպքում ասում է 77 ձայն, մի դեպքում 72, մի դեպքում էլ 71»,-ասաց նա։
«Բարգավաճ Հայաստան» խմբակցության քարտուղար Նաիրա Զոհրաբյանն էլ մեզ հետ զրույցում նշեց, որ ոչ կոալիցիոն ուժերի ՍԴ դիմելու հիմնավորումն այն է, որ «գազային պայմանագրերի» քվեարկության ժամանակ հաշվիչ հանձնաժողովի իրավասությունները իր վրա վերցրած պատգամավոր, հանձնաժողովի նախագահ Սուքիաս Ավետիսյանի գործողությունները եղել են ոչ իրավական:
«Հաշվիչ հանձնաժողովը չի աշխատել, և քվեարկությունը, որպես այդպիսին, տեղի չի ունեցել, իսկ դա նշանակում է, որ Հայաստանի Հանրապետությունը նման համաձայնագիր դե յուրե չի վավերացրել: Հաշվիչ հանձնաժողովը վավեր է այն ժամանակ, երբ անդամների մեծամասնության որոշում կա, իսկ նման որոշում չի եղել, որովհետև հաշվիչ հանձնաժողովը որևէ նիստ չի գումարել: Հիմա թույլ տանք, որ հարցը որոշի Սահմանադրական դատարանը»,- ասաց պատգամավորը:
Հարցին, թե ինչպիսի որոշման ակնկալիք ունեն Սահմանադրական դատարանից, Նաիրա Զոհրաբյանն ասաց, որ ինքը հույսեր չի կապում։ «Ես անձամբ որևէ հույս չեմ կապում, բայց դա չի նշանակում, որ մենք չպետք է դիմենք Սահմանադրական դատարան, չպետք է փորձենք վիճարկել այդ հարցը, որովհետև սա է հետագա քայլերը անելու մեր ուղիներից մեկը»,- ասաց նա:
Հիշեցնենք նաև, որ դեկտեմբերի 23-ին ԱԺ պետական-իրավական հարցերի մշտական հանձնաժողովի նախագահ, հանրապետական պատգամավոր Դավիթ Հարությունյանը հայտարարել էր, որ համաձայն չէ ոչ իշխանական ուժերի այն մոտեցման հետ, որ խորհրդարանի հաշվիչ հանձնաժողովի կայացրած որոշումը հակաօրինական է, քանի որ, ըստ նրա, հաշվիչ հանձնաժողովն ընդամենը կատարում է գործողություն` հաշվում է:
«ԱԺ նիստում անցավ որոշումը, թե չանցավ, որոշումը կայացնում է նիստը նախագահողը, տվյալ պարագայում միակ գործողությունը, որը պետք է կատարի հանձնաժողովը, իսկ դա ձայների հաշվարկն է, և դա իմ կարծիքով չի պահանջում որևէ որոշման ընդունում»,- հայտարարել էր նա:
Աղբյուրը՝ http://www.tert.am/am/news/2013/12/27/gazayin-hamadzaynagir/