Լրագրողների նկատմամբ այդ բռնությունըˋ սեփական հանցավոր գործունեությունը կոծկելու հերթական մի փորձ
06:22, February 15, 2014 | Այլ լրատվամիջոցներ, Նորություններ | Ազատության և անձնական անձեռնմխելիության իրավունք, Անձնական և ընտանեկան կյանքը հարգելու իրավունք, Խոշտանգումներից և անմարդկային կամ արժանապատվությունը նվաստացնող վերաբերմունքից զերծ մնալու իրավունք | Ոստիկանություն
Ամեն անգամ, երբ լրագրողի միջոցով ցույց է տրվում իշխանության իրական դեմքը, նրանց կողմից փորձ է արվում ամենաբռնի ուժով, ճնշումների գործադրմամբ կասեցնել այդ հնարավորությունը: Այս մասին Araratnews.am-ի հետ զրույցում ասում է Հելսինկյան քաղաքացիական ասամբելայի Վանաձորի գրասենյակի ղեկավար Արթուր Սաքունցըˋ անդրադառնալով լրագրող Անի Գեւորգյանի նկատմամբ բռնության դեպքին եւ ՀՀԿ-ական երիտասարդի՝ լրագրող Թեհիմնե Ենոքյանին ուղղված սպառնալիքներին:
«Քաղաքական զգայուն թեմաներով գործողությունների, միջոցառումների իրականացման ժամանակ իշխանությունները սկսում են իրենց ամբողջ զինանոցը գործի դնել: Բռնության իմաստը կոծկելն է սեփական գործողության հանցավոր բնույթը: Այս պահին 2008-ի մարտի 1-ին նվիրված ակցիայի իրազեկման կոծկումը, կամ բռնությունը իհարկե շատ անհանգստացնում է իրենց, քանի որ մինչեւ մարտի մեկը հանցագործությունները բացահայտված չեն: Իրազեկողների նկատմամբ այդ բռնությունը միանշանակ ես գնահատում եմ որպես սեփական հանցավոր գործունեության բնույթը կոծկելու հերթական մի փորձ»,- ասում է Սաքունցը:
Արթուր Սաքունցը կարծում է, որ այդ վարքագծի կրկնողությունը խոսում է անպատժելիության մասին:
«Որովհետեւ, երբ բազում անգամներ լրագրողների նկատմամբ բռնություններ են գործադրվել, եւ այդ բռնությունները չեն պատժվել օրենքի խստությամբ, դա ինքին հանդիսանում է հովանավորություն հանցագործություն կատարած անձանց: Անիի նկատմամբ Վարդան Գեւորգյանը, որը Երեւանի ոստիկանապետի տեղակալն է, փողոցում ակնհայտորեն բռնություն է գործադրել, երբ փոձում էր խլել տեսախցիկը»,- ասում է Սաքունցը:
Սաքունցը կարծում է, որ տվյալ դեպքում պետք չէ ծառայողական քննություն կատարել, այլ պետք է միանգամից Վարդան Գեւորգյանը հեռացվի, եւ եթե հեռացվի, ապա մյուս տեղակալը, ոստիկանը նման բան թույլ չի տա իրեն:
«Իրենք ցանկանում են մնալ չլուսաբանված, եւ պատահական չէ, որ Թեհմինեի նկատմամբ այդ սպառնալիքները, որ հանի այդ նկարները: Եթե դու բան չունես թաքցնելու, դե թող էնքան տպեն: Եթե դու թաքցնելու միտված գործողություններ ես կատարում, սպառալիքների գործադրմամբ, դա նշանակում է վախենում ես դրա հրապարակայնությունից: Ցանկանում են, որ չլուսաբանվի, միակողմանի միայն ինֆորմացիա գնա, միայն Հ1-ը լուսաբանի: Իսկ Հ 1-ից տարբերվող լրատվություն, տեղեկատվություն, վելուծություններ քիչ լինեն, որովհետեւ այդ բազմակարծության ձեւավորման մեջ տեսնում են իրենց համար վտանգ»,- ասաց Արթուր Սաքունցը:
Աղբյուրը՝ http://araratnews.am/Լրագրողների-նկատմամբ-այդ-բռնություն/