0 8000 12 11

«Հրազդան» հյուրանոցի դահլիճում այսօր հավաքվածների մեջ էին ճանաչված իրավապաշտպաններ, հասարակական, քաղաքական կազմակերպությունների պատասխանատուներ, նախկին պաշտոնյաներ, լրագրողներ, բնապահպանական շարժման ակտիվիստներ:

Ինչպես Երեւանի մամուլի ակումբի նախագահ Բորիս Նավասարդյանն ասաց, նպատակը համարժեք պատասխան տալն է այն իրողություններին, որոնց մասին հանրությունը ցանկանում է լսել. Քեսաբ, Մաքսային միություն, Ուկրաինա: Ըստ նրա՝ Հայաստանը որպես պետություն, եթե կան արձագանքներ, ապա ձայնակցում է, նրա ձայնը գոյություն չունի:

Ըստ իրավապաշտպան Արթուր Սաքունցի, հավաքի նպատակն էր ներգրավվել մարդկանց, որոնք կողմորոշված են դեպի Եվրոպական կառույցները. «Ամենադժվարը սկսելն է, եւ հիմա մենք սկսում ենք»:

Ակտիվիստ Զարուհի Հովհաննիսյանն  իր ելույթում անդրադարձավ ինֆորմացիոն դաշտին, որում թե ընդդիմությունը, թե դիմությունն է գտնվում: Ըստ նրա, ինֆորմացիան ծածկված է ռուսական ազդեցությամբ, եւ այլընտրանք կարծես գոյություն չունի:

Իրավապաշտպան Ավետիք Իշխանյանն այս հավաքը նմանեցրեց ապրիլի ութի դիմադրության հավաքի հետ: Նա ասաց, որ վտանգված է Հայաստանը, մենք հայտնվել ենք  անկախության կորստի առաջ: Եվ վիճակը նման է սովետական տարիներին, երբ ռուսները  հոկեյ էին խաղում, իսկ մենք ասում էինք` մերոնք են խաղում:

Քաղաքական վերլուծաբան Աղասի Ենոքյանի դիտարկմամբ էլ, ունենք մարդկանց մի խումբ, ավելի լայն զանգված, որը Մաքսային միությունից  բացի, այլ կյանք չի պատկերացնում: Ըստ քաղաքագետի, Ռուսաստանը գնում է կործանման, եւ երբ վաղը չի լինի այդ երկիրը, կրկին փլատակների տակ հայտնվելու վտանգն է սպառնալու Հայաստանին:

Գրող, մտավորական Վահրամ Մարտիրոսյանն առաջարկեց կուսակցություն ստեղծել ոչ ստանդարտ անուններով, մասնավորապես՝ «Եվրոպական ասոցիացիա», ինչը կողմնորոշում կարտահայտի: Նա ասաց, որ որեւէ  կուսակցության մեջ չի եղել, բայց ստեղծվելու դեպքում կմտնի դրա շարքերը: Ավետիք Իշխանյանն ասաց, թե շատ լավ կլինի, որ այդ այլընտրանքային ուժն անվանվի «Անկախության հռչակագիր»:

Ազգային անվտանգության ծառայության նախկին պետ Դավիթ Շահնազարյանի խոսքն ավարտվեց ծափերով: Նա ասաց, որ չունենք իշխանություն, ինքնիշխանություն, արտաքին քաղաքականություն. «Ավարտվում է քրեաօլիգարխիկ համակարգի կողմից կատարյալ դիկտատուրան»: Ըստ նրա ելույթի, քաղաքական համակարգը կազմում են ոչ միայն կուսակցությունները, այլ նաեւ լրատվամիջոցները: Ըստ անվտանգության ծառայության նախկին պետի, նույնպիսի քրեաօլիգարխիկ համակարգ է ստեղծված Ռուսաստանում, եւ Ռուսաստանը չպետք է նույնացնել Կրեմլի հետ, հանցագործ պուտինիզմի հետ, որը որպես երեւույթ ոչ միայն դատապարտելի է, այլ`հակապատմական է: Մտահոգիչն, ըստ նրա, այս համակարգի դեմ դուրս գալով կորուստները նվազեցնելն է:

Քաղաքական գործիչ Պետրոս Մակեյանի ելույթն ամենակարճն էր, ըստ նրա՝ առաջին քայլերից մեկը քաղաքական ուժերի «գույքագրումն» է, իրավիճակը փրկելը մինչ  այդ իրավիճակում հայտնվելը. «Քաղաքականությունն այնպիսին է, որ պետք հնարավորինն օգտագործես»:

Լրագրող Գայանե Առուստամյանը խոսեց բացառապես տեղեկատվական հոսքերի, լրատվամիջոցներ մասին, որոնք հսկողության տակ են վերցված:

Աղբյուրը՝ Առավոտ.am