Հայաստանը պատասխանում է Կոմիտեի հարցերին և խուսափում է ԼԳԲՏ մարդկանց առնչվող հիմնահարցերից
06:00, July 23, 2012 | Մամլո հաղորդագրություններ2012 թ. հուլիսի 17, Ժնև – ՄԱԿ-ի Մարդու իրավունքների կոմիտեն այսօր ավարտեց Հայաստանի երրորդ պարբերական զեկույցի ուսումնասիրությունը, որը տեղի ունեցավ 2012 թ. հուլիսի 16-ին և 17-ին:
Կոմիտեի և պետության պատվիրակության երկխոսությունը գրանցում էր առաջխաղացում որոշ ոլորտներում: Կոմիտեն մտահոգություն հայտնեց այլ ոլորտների առնչությամբ պետության կողմից տրամադրված տեղեկատվության սակավության վերաբերյալ: Կոմիտեն հաճախակի պնդում էր, որ պատվիրակությունն ավելի կոնկրետ և վիճակագրականորեն հիմնավորված պատասխաններ տար որոշ հարցերի: Հայաստանում 2008 թ. մարտի հետընտրական բռնությունների վերաբերյալ հարցերին ի պատասխան՝ պատվիրակությունը շատ քիչ բացատրություն ներկայացրեց թե՛ պատճառված մահերի հետաքննության, թե՛ քրեական պատասխանատվության բացակայության առնչությամբ:
Կոմիտեն առանձնակի ուշադրության արժանացրեց գենդերային հիմքով բռնության, մարդկանց թրաֆիքինգի, բանտային պայմանների, դատական համակարգում առկա կոռուպցիայի և խտրականության խնդիրները: Կոմիտեի անդամներից մեկը պետությանը կոչ արեց «խոսքից գործի անցնել և անհրաժեշտ ֆինանսավորում ապահովել գենդերային բռնության դեմ պայքարի համար»: Կոմիտեն հատուկ ուշադրություն դարձրեց Հայաստանի ԼԳԲՏ համայնքի նկատմամբ պետության վերաբերմունքի հիմնախնդրին: Կոմիտեն ստացել է տեղեկատվություն առ այն, որ մի պետական պաշտոնյա նախկինում հայտարարել է, որ ԼԳԲՏ անձինք «սպառնալիք են ազգային անվտանգությանը»: Այս խոցելի անձանց մարդու իրավունքների պաշտպանությանն ուղղված ներկայումս կիրառվող միջոցառումների վերաբերյալ պետության կողմից ներկայացված բացատրությունները նկատելիորեն աղքատիկ էին:
Տիրապետելով Հայաստանի դատական իշխանությունների օբյեկտիվության վերաբերյալ անկախ աղբյուրներից ստացած տեղեկատվությանը՝ Կոմիտեն պատվիրակությանը ներկայացրեց այն մեղադրանքներն, ըստ որոնց դատական իշխանությունները կախված են գործադիր իշխանությունից և դատավորները կողմնակալ վերաբերմունք են դրսևորում վարույթի ընթացքում: Կոմիտեն խիստ մտահոգ էր ՀԿ-ների կողմից ներկայացված հաշվետվություններով, որոնք նշում էին, որ դատավորները գործում են այն սկզբունքով, որ արդարադատությունը սակարկելի է և կարող է գնվել համապատասխան գնով:
Կոմիտեն պատվիրակությանը նաև հիշեցրեց, որ պետությունն արդեն 20 տարի է ինչ անդամակցում է Անհատական հաղորդման կամընտիր արձանագրությանը: Այնուամենայնիվ, այս ժամանակահատվածում Կոմիտենին չի ներկայացվել մարդու իրավունքների խախտման որևէ դեպք անհատ տուժածի կողմից: Այդ իսկ պատճառով Կոմիտեն կասկածի տակ դրեց այն հանգամանքը` արդյոք Պետությունը իրազեկել է Հայաստանի քաղաքացիներին իրենց հասանելի այս կարևոր ռեսուրսի մասին:
Հայաստանին տրվեց 48 ժամ անդրադառնալու Կոմիտեի կողմից ներկայացված այն հարցերին, որոնք անպատասխան մնացին, ինչը վկայում է այն մասին, որ վեցժամյա ինտենսիվ հարցուպատասխանից հետո Կոմիտեին այնուամենայնիվ անհրաժեշտ էր ստանալ ավելի շատ տեղեկատվություն պետությունից: Հայաստանը պետք է ավելի անկեղծ լինի մարդու իրավունքների իրավիճակի վերաբերյալ ճշգրիտ պատկեր ստեղծելու համար և ապահովի մարդու իրավունքների վերաբերյալ առկախ օրենսդրության և ծրագրերի ընդունումն ու իրականացումը: Այս գործուն միջոցները ծայրահեղ անհրաժեշտ են՝ ցույց տալու պետության պատրաստակամությունը պաշտպանելու Հայաստանի բոլոր մարդկանց մարդու իրավունքները:
Մարդու իրավունքների Կոմիտեի եզրահանգումները:
Հայաստանի զեկույցի վերանայման արխիվացված ինտերնետ հեռարձակումը կարելի է դիտել treatybodywebcast.org կայքում: Հայաստանի վերանայման մասին լրացուցիչ տեղեկատվության համար դիմել՝ Քաղաքացիական և քաղաքական իրավունքների կենտրոն. www.ccprcentre.org / info@ccprcentre.org
(Քաղաքացիական և քաղաքական իրավունքների կենտրոն /Էշլի Թաքեր)