Հայկ Կալեյանի գործով վկաները գտնվել են ապօրինի անազատության մեջ և ենթարկվել են բռնությունների
11:57, July 25, 2013 | Մամլո հաղորդագրություններ | Արդար դատաքննության իրավունք, Զինծառայողների/Զորակոչիկների իրավունքներ, Կյանքի իրավունք | Զինված ուժեր2013 թ. հուլիսի 23-ին ՀՀ Սյունիքի մարզի ընդհանուր իրավասության դատարանի Ստեփանակերտի նստավայրում կայացավ Հայկ Կալեյանի ինքնասպանության գործով դատական նիստ:
Տուժողի իրավահաջորդի ներկայացուցիչ Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցը ներկայացրեց մանրամասներ դատական գործընթացի վերաբերյալ:
Դատական նիստին լսվեցին գործով վկաներ Վոլոդյա Խաչատրյանը և Գևորգ Ղազարյանը: Վ. Խաչատրյանի նախաքննական և դատաքննական ցուցմունքները էականորեն տարբերվում էին միմյանից: Նա նախ հայտարարեց, որ 2012 թ. սեպտեմբերի 6-ից մինչև նոյեմբերի 7-ը գտնվել է ռազմական ոստիկանությունում և ցուցմունքները տվել է այնտեղ գտնված ժամանակ:
Դատաքննության ընթացքում ի հայտ եկան մի շարք անհամապատասխանություններ: Վ. Խաչատրյանը նշեց, որ Հայկ Կալեյանի, ըստ նախաքննական մարմնի վարկածի, ինքնասպանության նպատակով գնդացրից իրեն կրակելու ընթացքում, ինքն է առաջինը հասել դեպքի վայր, սակայն նախաքննության ցուցմունքի մեջ նա ասել էր, թե առաջինը վազելով դեպքի վայր է հասել վաշտի հրամանատար Դավիթ Ալեքսանյանը: Անհասկանալի էին նաև 2 հանգամանքներ՝ սերժանտը, որը եղել է խրամատին ամենամոտը առաջինը չի հասելԿալեյանի մոտ, և մյուսը՝ նախաքննական ցուցմունքներում գրված է եղել, որ բոլորը փախել են, երբ Հայկը գնդացիրը վերցրել և պտտվել է, սակայն հիմա Խաչատրյանը ասել է, որ ինքը վազել է դեպի Կալեյանը: Նա չի հիշում, թե զենքը ինչ դիրքով է ընկած եղել Կալեյանի մոտ, նաև չի տեսել թե ինչպիսի դիրքով է եղել Կալեյանը երբ կրակել է, նա միայն ենթադրում է, որ Կալեյանը որովայնով հենված է եղել զենքին: Խաչատրյանն իր ցուցմունքում ավելացրեց, որ անազատության մեջ են եղել նաև մի շարք այլ վկաներ:
Գևորգ Ղազարյանի ցուցմունքները նույնպես փոխված էին, նա նախ ասաց, որ Հայկի ինքնասպանությունը անսպասելի էր և դժվար է հավատալ, որ մարդը կարող էր անզույշ կրակել իրեն: Նա հայտարարեց, որ այլևս չի վախենում և որոշել է միայն ճիշտն ասել, ավելացնելով, որ ռազմական ոստիկանությունում ինչ-որ սևազգեստ անձիք՝ ովքեր չեն ներկայացել, իրեն ծեծել են և պահանջել, որ նա գրի այն ամենը ինչ քննիչներն են ուզում: Իսկ այնուհետև մեկ այլ սենյակում բացատրություն է տվել քննիչը:
Դատարանում այս առիթով Արթուր Սաքունցը միջնորդություն է ներկայացրել, որպեսզի վկայի նկատմամբ պաշտպանության միջոց կիրառվի, քանի որ այս խոսքերից հետո երաշխիք չկա, որ նրա հանդեպ ճնշում չի կիրառվի: Սակայն դատարանը մերժել է միջնորդությունը: Այսքանով ավարտվել է դատական նիստը: Հաջորդ դատական նիստը նշանակված է 2013 թ. օգոստոսի 16-ին: