0 8000 12 11

Հելսինկյան Քաղաքացիական Ասամբլեայի Վանաձորի գրասենյակը 2012 թ. փետրվարի 24-ին ստացել է անանուն ծրար, որը գրասենյակ է բերվել քաղաքացու կողմից, ով խնդրել է այն փոխանցել կազմակերպության նախագահին:

Ծրարի մեջ տեղադրված է եղել զեկուցագիր՝ ուղղված ՀՀ ԱՆ «Վանաձոր» ՔԿՀ-ի պետ Ա. Մխոյանին ՔԿՀ բժիշկ Ն. Սարգսյանից, որում վերջինս հայտնում է, որ Սլավիկ Ոսկանյանի զննության արդյունքում հանգել է այն եզրակացության, որ վերջինիս առողջական վիճակը կարող է ունենալ հետագա վատթարացում և այդ կապակցությամբ խնդրել է ՔԿՀ-ի պետից տալ հետագա ցուցումներ:

Հատկանշական է, որ չնայած այն հանգամանքին, որ Սլավիկ Ոսկանյանի «Վանաձոր» ՔԿՀում մահվան առնչությամբ քրեական գործն արդեն շուրջ 1 տարի  քննվում է, այնուամենայնիվ նախաքննության ընթացքում փաստաթուղթն առկա չի եղել, և այժմ այն անհայտ քաղաքացու կողմից բերվել է կազմակերպություն:

Կարծում ենք, որ այս փաստաթուղթն ուշադրության կարժանանա իրավապահ մարմինների կողմից «Վանաձոր» ՔԿՀ-ում Սլավիկ Ոսկանյանի մահվան հանգամանքներն ուսումնասիրելու հարցում:

Հիշեցնենք, որ Սլավիկ Ոսկանյանը մեղադրվում էր վանաձորցի Սվետլանա Կազազյանի սպանության և Աստղիկ Աղաբեկյանի նկատմամբ կատարված ավազակային հարձակման մեջ: 2010 թ. հոկտեմբերի 24-ին, ըստ նախաքննության մարմնի, նա մահացել է գազային գանգրենայից «Վանաձոր» ՔԿՀ-ում։

Կից ներկայացվում է Զեկուցագիրը: