ՄՄ և Եվրասիական ձևաչափում մեր մասնակցությունն այժմ արդեն բերելու է նաև Հայաստանի մեկուսացմանը. Ա. Սաքունց
10:10, March 7, 2014 | Այլ լրատվամիջոցներ, ՆորություններԱյժմ արդեն Մաքսային միության և Եվրասիական ինտեգրացիոն ձևաչափում Հայաստանի ներգրավումը հանգեցնելու է Հայաստանի առավել մեծ մեկուսացմանը:
Այս մասին Tert.am-ի հետ զրույցում ասաց Հայաստանի հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը՝ ավելացնելով. «Պուտինն իր քաղաքականությամբ իրեն դրել է իր երկիրը մեկուսացնելու վտանգի տակ և որպես մեկուսացումից դուրս գալու փորձնական քայլ՝ անցել է դաշնակիցների հավաքագրման գործընթացին: Որ ցույց տա աշխարհին, որ ինքը մենակ չի, և թեկուզ նման քաղաքականություն վարելով Ուկրաինայի հանդեպ` ունի դաշնակիցներ»,-ասաց Արթուր Սաքունցը:
Վերջինիս խոսքով՝ նման մեկուսացումը շատ ավելի թանկ կարող է անդրադառնալ Հայաստանի նման պետության վրա:
Հիշեցնենք, որ Եվրասիական բարձրագույն տնտեսական խորհրդի երեկ տեղի ունեցած նիստում Ռուսաստանի նախագահ Վլադիմիր Պուտինը հայտարարել է, որ եվրասիական ինտեգրացիոն գործընթացը գրավում է ԱՊՀ-ի իրենց գործընկերներին:
Արթուր Սաքունցը նկատեց, որ անգամ Բելառուսը, որը, թվում էր, թե պետք է կանգներ Ռուսաստանին աջակցության դիրքերում, դա չարեց:
Ի պատասխան հարցի, թե արդյո՞ք Արթուր Սաքունցը նաև նկատի ունի այն, ինչն ասել էր ընդդիմադիր գործիչ Դավիթ Շահնազարյանը, որ վստահ է՝ ՌԴ-ն մեր իշխանությունների վրա լուրջ ճնշումներ է գործադրում՝ Ուկրաինայի նկատմամբ Հայաստանի հաստատած լռությունը խախտելու համար, Արթուր Սաքունցն ասաց, որ սեպտեմբերի 3-ից հետո Հայաստանը Ռուսաստանին տվել է իր փոխարեն որոշումներ ընդունելու մանդատ:
Նրա խոսքով՝ Հայաստանի լռությունը ուկրաինական իրադարձությունների հարցում արդեն իսկ դիրքորոշում է:
Հիշեցնենք, որ «Կովկաս» ինստիտուտի տնօրեն Ալեքսանդր Իսկանդարյանը, հակառակը, Երևանի լռությունը շատ ճիշտ է համարում՝ նկատի ունենալով, որ այնտեղ 400 հազարից ավելի հայ է բնակվում:
«Եվ, հետևաբար, այս իրավիճակում, Հայաստանը պետք է անի միայն մեկ բան՝ լռել և սպասել, ինչպես վարվում է ողջ աշխարհը, բացի «անձնապես» շահագրգիռ երկրներից»,- նշել էր Ալ. Իսկանդարյանը: