Շուշիում ապահովված չէ ցմահ ազատազրկված Հազրոյանի և պաշտպանի անվտանգությունը
00:00, August 4, 2011 | Մամլո հաղորդագրություններ | Արդար դատաքննության իրավունք, Զինծառայողների/Զորակոչիկների իրավունքներ, Խոշտանգումներից և անմարդկային կամ արժանապատվությունը նվաստացնող վերաբերմունքից զերծ մնալու իրավունք, Կյանքի իրավունք | Զինված ուժերՄանվել Հազրոյանը, ով մեղադրվում է 2010թ.-ի նոյեմբերի 19-ին Լեռնային Ղարաբաղի Ջաբրայիլ զորամասի պահպանության տակ գտնվող առաջնային բնագծում չորս ժամկետային զինծառայողների սպանության մեջ, երեկ` օգոստոսի 3-ին, Սյունիքի մարզի ընդհանուր իրավասության դատարանի կողմից (դատավոր Համլետ Դավթյան) դատապարտվեց ցմահ ազատազրկման:
Ինչպես տեղեկացրել էր Հելսինկյան Քաղաքացիական Ասամբլեայի Վանաձորի գրասենյակը, դատավճռի հրապարակումից հետո Մանվել Հազրոյանը սեղանին դրված ջերմուկի շիշը շպրտել էր դատավորի ուղղությամբ: Դրանից անմիջապես հետո Հազրոյանին ուղեկցողները` Շուշիի քրեակատարողական հիմնարկի աշխատակիցները, ուժի գործադրմամբ ձեռնաշղթաներ էին հագցրել և նրան վնասազերծել հենց դատարանի դահլիճում, որից հետո սկսել էին ծեծել:
Այդ ընթացքում դահլիճից դուրս էին հանել ներկաներին, և երբ նրա պաշտպան Էդմոն Մարուքյանը փորձել էր միջամտել և ասել, որ նա արդեն վնասազերծված է, իր պատիժը ստացել է, իսկ դատավորի նկատմամբ կատարած արարքի համար կստանա պատիժ, բռնություն կիրառողներից երեքը սկսել էին պաշտպանին քաշքշել: Էդմոն Մարուքյանի փոխանցմամբ` միայն Հելսինկյան Քաղաքացիական Ասամբլեայի Վանաձորի գրասենյակի ներկայացուցչի և դատավորի բազմաթիվ հորդորներից հետո են ՔԿՀ-ի աշխատակիցները սթափվել և դադարեցրել իրենց բռնի գործողությունները: Թեև նրանցից մեկը վերջում «շպրտել է» պաշտպանին` լավ ենք անում, որովհետև դու նրան պաշտպանում ես:
Իհարկե, Էդմոն Մարուքյանը պահանջելու է իրավապահներից քրգործ հարուցել ամբաստանյալի նկատմամբ բռնություն կիրառելու, իր` փաստաբանական գործունեությունը բռնությամբ խոչընդոտելու փաստով, և իրականացնել օբյեկտիվ, բազմակողմանի, լրիվ քննություն բռնարարքներ թույլ տված ՔԿՀ-ի աշխատակիցների նկատմամբ: Սակայն հարցն այն է, թե որ երկրի իրավապահները պետք է զբաղվեն այդ հարցով, քանի որ դատավճիռը հրապարակել է Հայաստանի Հանրապետության Սյունիքի մարզի ընդհանուր իրավասության դատարանը, սակայն ԼՂՀ մայրաքաղաք Ստեփանակերտում:
Էդմոն Մարուքյանը «Առաջին լրատվական»-ի հետ զրույցում, մեր ուշադրությունը հրավիրեց այն հանգամանքին, որ իրենք դեռ նախաքննության նախնական փուլում միջնորդել էին ՀՀ քաղաքացի Մանվել Հազրոյանի անվտանգությունն ապահովելու համար նրան Շուշիի ոստիկանությունից, հետագայում էլ` ՔԿՀ-ից տեղափոխել Հայաստան: Սակայն միջնորդությունը մերժվել էր:
Եվ պաշտպանի մտահոգությունն այժմ հիմնավորվեց. եթե Շուշիի ՔԿՀ-ի աշխատակիցների կողմից Մ.Հազրոյանի և իր նկատմամբ բռնություններ են կիրառվում հենց դատարանի դահլիճում` Մ.Հազրոյանի հարազատների, լրագրողների ներկայությամբ, և վախի մթնոլորտ ստեղծելով` վտանգում դատարանում մեղադրյալի և նրա պաշտպանի անձեռնմխելիության և անվտանգության երաշխիքները, առանց որոնց ապահովման անհնար է արդյունավետ պաշտպանության և արդարադատության իրականացումը, ապա ի՞նչ երաշխիք, որ նույնը չի կրկնվի օգոստոսի 8-ին կայանալիք մեկ այլ զինվորական գործով դատաքննության ժամանակ: Այնտեղ Էդմոն Մարուքյանը պաշտպանում է զինծառայող, տուժող Կոծինյանի շահերը: