Վանաձորը ՀՀ վարչապետ, նախագահի թեկնածու Սերժ Սարգսյանի այցելության նախօրյակին
00:00, February 6, 2008 | Հավաքների և միավորումների ազատություն
Վանաձորի տարբեր պետական հիմնարկների աշխատակիցների կողմից տրամադրված տեղեկատվությամբ՝ հատուկ խնամքով, պարտադրաբար կազմակերպվում է նախագահի թեկնածու Սերժ Սարգսյանի նախընտրական հանդիպումը Վանաձորում:
Հունվարի 6-ին Վանաձորի ԲՈՒՀԵՐ-ում, հանրակրթական դպրոցներում, մանկապարտեզներում, պոլիկլինիկաներում և պետական այլ հիմնարկներում տնօրենները աշխատակիցների ժողովներ են հրավիրել:
Օրակարգի միակ հարցը նախագահի թեկնածու Սերժ Սարգսյանի այցելությունն է Վանաձոր:
Բոլոր հաստատություններում աշխատակիցները խիստ հրահանգ են ստացել պարտադիր մասնակցել Վանաձորի «Հայքի» հրապարակում կայանալիք հանդիպմանը:
Հանրակրթական դպրոցներում նախօրեին երեխաներին փուչիկներ են բաժանվել, որով պիտի պատկերվի «Առաջ Հայաստան» լոզունգը, ԲՈՒՀԵՐ-ի ուսանողները նույն լոզունգը պատկերել են հատուկ ցուցապաստառների վրա:
Որոշ հիմնարկներում հատուկ գրանցամատյաններ են պատրաստվել, որտեղ էլ «ներկա-բացակա» են անելու աշխատակիցների մասնակցությունը: Տնօրենները նույնիսկ սպառնացել են աշխատակիցներին, որ չմասնակցելու դեպքում հետևանքները լավ չեն լինի:
Մեծ նախապատրաստություններ են իրականացվել նաև Ս.Սարգսյանի նախընտրական շտաբներում:
Նախընտրական շտաբներից դրոշակներ են բաժանվել հանդիպմանը դրանցով մասնակցելու համար: