Քաղաքակա՞ն էր արդյոք Օսկանյանի նկատմամբ քրեական հետապնդումը
14:29, July 25, 2013 | Նորություններ
Հետընտրական քաղաքական զարգացումները կարծես թե իրենց բարենպաստ ազդեցությունն ունեցան ԲՀԿ-ական պատգամավոր, նախկին արտգործնախարար Վարդան Օսկանյանի «քրեական» գործունեության վրա: Ընտրություններից հետո իշխանություններից ընդամենը 5 ամիս պահանջվեց՝ ավարտելու Օսկանյանին փողերի լվացման մեղադրանքով առաջադրված քրեական գործի քննությունը: Երեկ Ազգային անվտանգության ծառայությունը հաղորդագրությամբ տեղեկացրեց, որ Օսկանյանի նկատմամբ հարուցված քրգործը կարճվել է: Մինչդեռ դեռեւս անցած տարվա հոկտեմբերի 2-ին գլխավոր դատախազ Աղվան Հովսեփյանը, հիմնավորումների դավթարը թեւի տակ, մտավ Ազգային ժողով` միջնորդելով զրկել Օսկանյանին պատգամավորական անձեռնմխելիությունից, որպեսզի հնարավորություն ստանան նրան ներգրավելու որպես մեղադրյալ: Աղվան Գառնիկիչը 3-4 օր շարունակ բարձր պրոֆեսիոնալիզմով հիմնավորում էր, փաստեր բերում, պատասխանում պատգամավորների տարատեսակ հարցերին՝ ապացուցում, որ վտանգավոր հանցագործություն է կատարվել, եւ հանցագործը պետք է պատժվի, իսկ դրա համար անհրաժեշտ է, որ իրենց ձեռքերն ազատ լինեն՝ կարողանան պատգամավոր Օսկանյանին հրավիրել, հարցաքննել, մեղադրանք առաջադրել: Օսկանյանը զրկվեց անձեռնմխելիությունից, 64 պատգամավոր կողմ քվեարկեց Գառնիկիչի միջնորդությանը: Բայց արի ու տես՝ գործը տրամաբանական ավարտ չունեցավ: Ըստ ԱԱԾ հաղորդագրության, Օսկանյանը նախաքննական մարմնին հուլիսի 19-ին դիմում է ներկայացրել, ապա այդ կապակցությամբ ցուցմունք տվել՝ խոստովանելով, որ Ջոն Հանթսմանի կողմից «Սիվիլիթաս» հիմնադրամին բացառապես բարեգործական նպատակներով օգտագործելու համար նվիրաբերված գումարից 250.795,26 ԱՄՆ դոլարն օգտագործել է անձնական նպատակներով՝ դա դիտարկելով որպես գործարքի իր մասնաբաժին։ Բացի դա, Օսկանյանը պատրաստակամություն է հայտնել վճարել դրանից առաջացող, հարկային մարմնի կողմից հաշվարկված հարկային պարտավորության գումարը: Նա ընդունել է, որ որոշ հարցերում թերացել է, բայց պատրաստակամություն է հայտնել շտկել դրանք: Արդյունքում էլ ԱԱԾ-ն մեծահոգաբար վերաորակել է փողերի լվացման հոդվածը` նրան առաջադրելով առանձնապես խոշոր չափերով հարկերը վճարելուց չարամտորեն խուսափելու հանցակազմ, նախատեսված ՀՀ քրեական օրենսգրքի 205-րդ հոդվածի 2-րդ մասով։
Նշենք, որ քրգործի հարուցման առաջին օրվանից եւ Օսկանյանը, եւ ԲՀԿ-ական մյուս պատգամավորները միաբերան պնդում էին, որ դա քաղաքական հետապնդում է: Երեկ ԲՀԿ մամուլի խոսնակ Տիգրան Ուրիխանյանն ակնհայտորեն խուսափեց պատասխանել մեր այն հարցին, թե կարելի՞ է ասել, որ Օսկանյանի այն բոլոր հայտարարությունները, թե այս քրեական գործը քաղաքական ենթատեքստ ունի, քրգործի կարճմամբ հիմնավորվեց: Շարունակո՞ւմ եք պնդել, որ Օսկանյանի նկատմամբ իրականացվող հետապնդումը քաղաքական էր` հարցրինք: «Ես չեմ ցանկանում անել մեկնաբանություններ, որովհետեւ Ձեր հարցը հռետորական է»,-հայտարարեց Ուրիխանյանը: Մեր դիտարկմանը, թե հարցը բոլորովին էլ հռետորական չէ եւ պահանջում է կոնկրետ պատասխան, ԲՀԿ խոսնակը մեր հարցը հռետորական որակելուց զատ այլ հստակ պատասխան չտվեց: Այս պատասխանը եւս պատասխան էր եւ փաստում է, որ այս հարցում իսկապես կոնկրետ քաղաքական հաշվարկներ կան: Ցավոք, այսքանից հետո ԲՀԿ-ն այլեւս չի կարող խիզախ հայտարարություններ անել իշխանությունների հասցեին եւ պնդել, որ այդ հետապնդումը քաղաքական էր:
Իրավապաշտպան Արթուր Սաքունցը, սակայն, այդ հարցում համոզված է: «Ես շարունակում եմ պնդել, որ Վարդան Օսկանյանի նկատմամբ քրեական հետապնդումը քաղաքական հետապնդման նպատակ ուներ: Ամբողջ նպատակն այն էր, որ նախագահական ընտրություններից առաջ «Բարգավաճ Հայաստան» կուսակցությունը թեկնածու չառաջադրեր: Քրեական հետապնդման դադարեցումը դրա վառ ապացույցն է»,- ասաց նա` ավելացնելով, որ նման պարագայում շատ կարեւոր է, որ Օսկանյանը հանդես գա պատասխան քայլերով: «Բայց կարծում եմ, որ տվյալ պարագայում հավանական է, որ հարցը գործարքի գնալու ճանապարհով լուծված լինի: Հիմա ամեն ինչ կախված է Օսկանյանից: Նա պետք է հավաստիացնի` գործարք եղել է, թե ոչ»: Իրավապաշտպանի խոսքով, աղմկահարույց գործը կարճելու պարագայում որոշ մարդիկ հայտնվեցին հիմար վիճակում: «Ոչ միայն դատախազն է հիմար վիճակում հայտնվում, այլեւ նրան հրահանգ տվողներն են հիմար վիճակում հայտնվում: Բայց առավել մեծ հիմարության մեջ ուզում են գցել հանրությանը` իրավական մեխանիզմները կիրառելով իրենց հայեցողությամբ, ամեն գնով պահպանելով սեփական քաղաքական իշխանությունը»: Սաքունցի խոսքով, այս հարցում հանրության համար շատ կարեւոր է, թե իրավապահները որքանով են պատշաճ կիրառում իրենց գործառույթները, անկախ նրանից՝ Օսկանյանն է, թե մեկ ուրիշը: «Մենք հիմա գործ ունենք մի իրավիճակի հետ, երբ որ իրավապահներն իրենց գործառույթներն իրականացնում են, ելնելով զուտ քաղաքական նպատակահարմարությունից, այլ ոչ թե օրենքի պահանջներից: Իրավական համակարգի նկատմամբ վստահության մասին խոսելն ավելորդ է: Այս ամենը բերում է արդեն իրավական համակարգի կազմաքանդման»:
Քրգործի կարճումից հետո, «ըստ ընթացակարգի», գլխավոր դատախազը պետք է գրությամբ դիմի Ազգային ժողովին՝ տեղեկացնելով, որ քրեական հետապնդումը դադարեցվել է, գործը կարճվել, որից հետո կվերականգնվի Օսկանյանի անձեռնմխելիությունը: «Այսինքն՝ Ազգային ժողովին էլ են խաղալիք դարձրել իրենց ձեռքին»,-եզրափակեց Սաքունցը:
ՀԳ – Ի դեպ, ԱԱԾ հաղորդագրությունից հետո Օսկանյանը հայտարարություն տարածեց. «Այս ամենի մեջ ամենակարեւորն այն է, որ ինձ առաջադրված «փողերի լվացման» եւ «փողերի յուրացման» երկու ծանր մեղադրանքները, ինչի արդյունքում ինձ զրկեցին պատգամավորական անձեռնմխելիությունից, հանցակազմի բացակայության պատճառով չեն կարողանում ապացուցել եւ ստիպված են լինում այլ ճանապարհներով գործը կարճել: Ասեմ, որ ես որեւէ խոստովանություն չեմ արել: Կից ներկայացնում եմ ԱԱԾ-ին ուղարկած իմ նամակի բովանդակությունը՝ առանց ԱԱԾ մեկնաբանությունների»: Մեզ թվաց, թե կից նամակում բոլորովին այլ տեքստ ենք հայտնաբերելու, բայց պարզվեց՝ նույնն է: Մեկնաբանություններն են տարբեր:
Աղբյուրը՝ http://hraparak.am/news/view/37354.html