Քարոզարշավ` նվիրված ՄԻԱՎ/ՁԻԱՀ-ի համաշխարհային օրվան
00:00, December 3, 2009 | Մամլո հաղորդագրություններ | Պացիենտների իրավունքներԲաց Հասարակության ինստիտուտի Հայաստանի մասնաճյուղի նախաձեռնությամբ 2009թ-ի դեկտեմբերի 4-ից մինչև 6-ը Հայաստանի մի շարք մարզերում իրականացվում է ՄԻԱՎ/ՁԻԱՀ-ի դեմ պայքարի համաշխարհային օրվան նվիրված քարոզարշավ:
Քարոզարշավի շրջանակներում նախատեսվում է Գյումրի, Վանաձոր քաղաքներում կազմակերպել կլոր-սեղան քննարկումներ և հեռուստաեթերներ, որոնց ժամանակ հանրությանը կներկայացվեն ներարկային թմրամիջոցներ օգտագործողների, նույնասեռականների, սեռական ծառայություններ մատուցող անձանց, ինչպես նաև կանանց ու երիտասարդների խնդիրները ՄԻԱՎ/ՁԻԱՀ համատեքստում:
Կքննարկվի նրանց իրավունքների և հիմնարար ազատությունների լիարժեք իրականացման անհրաժեշտությունը` որպես ՄԻԱՎ/ՁԻԱՀ համաճարակի դեմ գլոբալ պայքարի կարևորագույն բաղադրիչ, քանի որ հանրային առողջության պաշտպանությունը հնարավոր է միայն մարդու բոլոր իրավունքները պաշտպանելու միջոցով:
Քարոզարշավին մասնակցում են խոցելի խմբերի շահերի պաշտպանություն իրականացնող մի շարք կազմակերպություններ, այդ թվում` ”Հելսինկյան Քաղաքացիական Ասամբլեայի Վանաձորի գրասենյակ”, “Հակաթմրամոլային քաղաքացիական դաշինք”, ”Իրական Աշխարհ, Իրական Մարդիկ”, ինչպես նաև ”Հանրային տեղեկատվություն և գիտելիքի կարիք” հասարակական կազմակերպությունները:
Առաջին կլոր-սեղան քննարկումը կիրականացվի դեկտեմբերի 4-ին ժամը 16.00-ին Գյումրի լրագրողների ”Ասպարեզ” ակումբում: Նույն օրը` ժամը 20.00-ին Գյումրիի ”Ցայգ” հեռուստաընկերության ուղիղ եթերով կկայանա հեռուստաքննարկում, որին կմասնակցեն վերը նշված կազմակերպությունների ներկայացուցիչները:
Երկրորդ կլոր-սեղան քննարկումը կիրականացվի Վանաձորում` դեկտեմբերի 5-ին ժամը 15.00-ին, իսկ հեռուստաքննարկումը կկայանա նույն օրը, ժամը 19.00-ին՝ Վանաձորի ”Լոռի” հեռուստաընկերության ուղիղ եթերով:
Լրացուցիչ տեղեկատվության ստացման համար կարող եք դիմել ”Հելսինկյան Քաղաքացիական Ասամբլեայի Վանաձորի գրասենյակ”՝ ”Իրավական աջակցություն Լոռու, Շիրակի, Տավուշի մարզերի և Երևանի թմրամիջոց գործածողներին” ծրագրի համակարգող Ելենա Սարգսյանին (հեռախոս՝ 374322 4 22 68, hcav@hcav.am):