Օտարված տարածքների խնդիրը մնում է արդիական
00:00, January 16, 2007 | Քաղաքացիական նախաձեռնությունների աջակցությունՀունվարի 16-ին Վանաձորի տնակային ավանների հողատարածքների օտարման խնդրով մամլո ասուլիս էր հրավիրել Հելսինկյան Քաղաքացիական Ասամբլեայի Վանաձորի գրասենյակը:
Ասուլիսը նպատակ ուներ հանրայնացնել տնակային ավանի հողատարածքների օտարման գործընթացը:
ՀՔԱ Վանաձորի գրասենյակի ղեկավար Արթուր Սաքունցը ներկայացրեց տնակների զբաղեցրած հողատարածքների օտարման գործընթացում կազմակերպության ուսումնասիրության արդյուքները:
Խնդիրն այն է, որ 2002-2004թթ Վանաձորի քաղաքապետարանի կողմից աճուրդի է դրվել և օտարվել 41 կտոր հողատարածք: Ներկայումս հողատարածքները նոր սեփականատերեր ունեն, երբ դեռևս տնակները տեղադրված են այդ տարածքներում: Արթուր Սաքունցը նշում է, որ հողերի օտարման փաստը քաղաքապետարանը թաքցրել է համայնքի բնակիչներից: Միևնույն ժամանակ քաղաքապետարանը հանդես է գալիս հողերի սեփականատիրոջ անունից, տնակի բնակիչներից պահանջում ազատել հողատարածքները:
Ովքե՞ր են այդ սեփականատերերը, և ինչու՞ է Վանաձորի քաղաքապետարանը սեփականատիրոջ փոխարեն տնակն ազատելու պահանջով հայցեր ներկայացնում Լոռու մարզի առաջին ատյանի դատարան:
ՀՔԱ Վանաձորի գրասենյակը հողատարածքների օտարման գործընթացի օրինականութունը պարզելու համար 2006թ-ի հուլիսին գրություն էր ուղարկել Լոռու մարզի դատախազություն, որի պատասխանը ստացվել է դեկտեմբերին: Գրության մեջ նշվում է, որ 2002-2005թթ Վանաձորի քաղաքապետարանի կողմից օտարվել է Վանաձոր քաղաքի քիմ. կոմբինատի տարածքի թիվ 1, 2, 3, 4, 5 տնակային ավանների հողատարածքները: Հողամասերի վաճառքը կատարվել է աճուրդային կարգով, ՀՀ օրենսդրության պահանջներին համապատասխան: Տնակի բնակիչները աճուրդի մասին տեղյակ չեն եղել և չեն մասնակցել: Այս դեպքում Դատախազությունը նշում է, որ բնակիչները տնակի տարածքն ազատելու քաղաքապետարնի պահանջը կարող են բողոքարկել վերադաս դատական կարգով:
«Մամլո ասուլիսի միջոցով մենք ուզում ենք տեղեկացնել մեր շահառուներին, որ տնակներն ազատելու քաղաքապետարանի պահանջն անօրինական է»,-իր խոսքում նշեց Արթուր Սաքունցը:
Նա տեղեկացրեց նաև, որ քաղաքապետարանի նման պահանջն արդեն բողոքարկվել է Վերաքննիչ դատարանում, և տարածքներն ազատելու քաղաքապետարանի պահանջը մերժվել է:
ՀՔԱ Վանաձորի գրասենյակի իրավախորհրդատվական բաժնի համակարգող, փաստաբան Կարեն Թումանյանը ներկայացրեց իրավական հետևանքները: