0 8000 12 11

Նոյեմբերի 4-ին Վանաձորում կայացավ Սահմանադրական փոփոխությունների դեմ  պայքարող «Նոր Հայաստան» միավորման կազմակերպած հավաքը, որին նախորդեց հավաքի մասնակիցների կողմից իրականացված երթը Վանաձորի կենտրոնական փողոցներով, երթի նպատակը քաղաքացիներին իրազեկելն էր հավաքի մասին, քանի որ, ըստ Անդրիաս Ղուկասյանի, նախապես ապատեղեկատվություն էր տարածվել այն մասին, որ հանրահավաք չի լինելու: Հավաքի ընթացքում ելույթ ունեցան «Նոր Հայաստան» ճակատի քաղաքական խորհրդի անդամներ Ժիրայր Սեֆիլյանը, Գարեգին Չուգասզյանը, Արմեն Մարտիրոսյանը, Անդրիաս Ղուկասյանը և այլք: Արմեն Մարտիրոսյանն իր ելույթում անդրադարձավ Սահմանադրական  փոփոխությունների վերաբերյալ ՀՀ իշխանությունների կողմից կայացված արտահերթ որոշմանը, ապա խոսեց երկրում տիրող սոցիալական ծանր դրությունից՝ խոսքի վերջում դիմելով ժողովրդին. «Բոլորս դեպի պայքար, այլ ճանապարհ չկա»:

Ապա խոսքը տրվեց Գարեգին Չուգասզյանին, ով նշեց, որ փորձ է արվում՝ Հայաստանի ժողովրդին վերագրել ամենացածր մարդկային հատկանիշները՝ հոգեբանորեն կոտրելով նրա պայքարի կամքը, իսկ քաղաքացիական ակտիվություն ցուցաբերողները որակվում են որպես դրսի ուժերին ծառայող գործակալներ: Անդրադառնալով խորհրդարանական համակարգի անցմանը՝ նշեց. «Ուզում են իրենք իրենց ընտրել՝ հանրությանը զրկելով ընտրություն կատարելու հնարավորությունից»:

Ժիրայր Սեֆիլյանն էլ անդրադառնալով սոցիալական մի շարք խնդիրների, այդ թվում՝ ՀՀ իշխանությունների որդեգրած հարկային կեղեքող քաղաքականությանը՝ հորդորեց պայքարի ելնել՝ ընդգծելով՝ «Մենք կորցնում ենք հայրենիք»:

Մյուս բանախոսները ևս դիրքորոշում հայտնեցին Սահմանադրության նախագծի շուրջ՝ կոչ անելով դեկտեմբերի 1-ին մասնակցել Երևանում կայանալիք համազգային հավաքին:

Հավաքի ավարտին ևս կայացավ երթ, որի սկզբում ոստիկանները փորձեցին խոչընդոտել հավաքի մասնակիցների երթը փողոցով՝ հրահրելով բախումներ: Ի վերջո, տեղի տալով քաղաքացիների համառությանը՝ ոստիկաններն ապահովեցին երթի անվտանգ ընթացքը: