Ունենք ընտրակաշառքի խորհրդարան՝ հանձինս ՀՀԿ-ի, Ծառուկյան դաշինքի և ՀՅԴ-ի
12:00, April 6, 2017 | Այլ լրատվամիջոցներ, Նորություններ | Ընտրական իրավունք«Առաջին լրատվական»– ի հետ զրույցում անդրադարձ կատարելով արիլի 2-ին տեղի ունեցած խորհրդարանական ընտրություններին և դրան նախորդած ժամանակահատվածին, երբ 4+4+4 ձևաչափով քննարկումների արդյունքում ընդդիմության և իշխանության ներկայացուցիչների փոխհամաձայնության արդյունքում փոփոխություններ եղան նոր Ընտրական օրենսգրքում, և կարծիքներ հնչեցին, որ նոր ԸՕ-ով բացառվելու են կեղծիքներն ու խախտումները, ՀՔԱ Վանաձորի գրասենյակի ղեկավար Արթուր Սաքունցը նշեց. «Ունենք մի այսպիսի վիճակ՝ միշտ թերագնահատում են իշխանությանը և Սերժ Սարգսյանին, այն առումով, որ նույնիսկ ամենավառ երևակայությունը հնարավորություն չի տալիս պատկերացնելու, թե իշխանությունը ընտրությունը կեղծելու էլ ինչ գործիքներ կարող է մտածել:
Եթե իշխանությունը ինչ-որ բան զիջում է, պետք է ենթադրել, որ դրա փոխարեն այլ միջոցներ պետք է զարգացնի, այն, ինչ տեսանք այս ընտրությունների ժամանակ:
Ընտրական օրենսգիրքի փոփոխությունը բացարձակապես չհանդիսացավ և չէր էլ կարող հանդիսանալ ազատ և արդար ընտրությունների երաշխիք:
Բուն խնդիրը պայմանավորված է անպատժելիության համակարգով, կոռուպցիայով: Այսինքն՝ հույս ունենալ, որ ինչ-որ իրավական փաստաթուղթ կարող է արդյունավետ լինել այն դեպքում, երբ որ փաստացի իրավիճակը չի փոխվել, դա առնվազն միամտություն է:
4+4+4 ձևաչափով քննարկումներին մենք չենք մասնակցել, որովհետև չի կատարվել իշխանության կողմից ոչ մի քայլ հանձին կոռուպցիայի դեմ պայքարի խորհրդի, որն անգործունակ է ի սկզբանե, կենդանի դիակ է»:
Սաքունցի խոսքով, այն, որ ՀՀԿ տարածքային ընտրական ցուցակում պանամական կոռուպցիոն հանցագործության հետ առնչվող մարդ է առաջադրվել, սա արդեն իսկ ահազանգ պետք է լիներ, կամ երբ որ վարչական ռեսուրսի կազմակերպված և զանգվածային չարաշահման փաստ արձանագրվեց «Իրազեկ քաղաքացիների միավորում» ՀԿ-ի կողմից, և համակարգն անհաղորդ մնաց, ավելին՝ փորձում են թիրախավորել ուսումնասիրություն իրականացրած անձին և ոչ թե քննություն իրականացնել և տալ պատշաճ իրավական գնահատական: Ահազանգ է նաև քրեական տարրերի սերտաճվածությունը իշխանության հետ և որպես գործիք օգտագործելը ընտրությունների ժամանակ ընտրողների վրա ճնշում գործադրելու համար:
Ա. Սաքունցն ընդգծեց, որ տեխնիկական միջոցների զարգացումը երաշխիք չի կարող հանդիսանալ. «Սա ընդամենը իմիտացիա էր, ցույց տալու համար, որ ունեն կամք ընտրությունները ավելի ազատ, արդար անցկացնել, բայց իրականում իրենք զուգահեռ ունեն գործիքակազմ, որը կիրառում են իրենց իշխանությունը պահպանելու համար»:
Մանրամասները՝ տեսանյութում: