Անհայտ կորածի մոր կենսաթոշակը դադարեցվել է սահմանված կարգի խախտմամբ. վերաքննիչ վարչական դատարանի որոշումը
13:56, April 11, 2018 | Նորություններ, Սեփական լրատվություն | Հակամարտություններից տուժածների իրավունքներ
2018 թ. ապրիլի 10-ին ՀՀ Վարչական վերաքննիչ դատարանը մասնակի բավարարեց անհայտ կորածի մայր Սվետլանա Սարգսյանի կենսաթոշակ ստանալու իրավունքը վերականգնելու մասին ՀՀ վարչական դատարանի վճռի դեմ ՀՀ ՊՆ բողոքը:
ՀՀ Վարչական դատարանը վճիռը կայացրել էր 2017 թ. ապրիլի 10-ին՝ Ս. Սարգսյանի և նրա ներկայացուցիչ, ՀՔԱ Վանաձորի գրասենյակի Երևանի ներկայացուցչության իրավաբան Տաթևիկ Սիրադեղյանի հայցի հիման վրա:
Վարչական դատարանը անվավեր էր ճանաչել Ս. Սարգսյանի՝ կերակրողին կորցնելու հիմքով կենսաթոշակ ստանալու իրավունքը դադարեցնելու ՀՀ ՊՆ որոշումը, ոչ իրավաչափ էր ճանաչել Ս. Սարգսյանի կենսաթոշակին վերաբերող փաստաթղթերը ՀՀ Աշխատանքի և սոցիալական հարցերի նախարարության սոցիալական ապահովության պետական ծառայությանը չփոխանցելու գործողությունները և պարտավորեցրել էր ՀՀ Պաշտպանության նախարարությանը՝ փոխանցել դրանք:
Երեկ Վարչական վերաքննիչ դատարանը ՊՆ-ի բողոքը բավարարեց միայն կենսաթոշակ ստանալու իրավունքը դադարեցնելու մասին որոշումն անվավեր ճանաչելու մասով:
Դատարանի դիրքորոշմամբ՝ կենսաթոշակ ստանալու իրավունքը դադարեցվել է սահմանված կարգի խախտմամբ, և դրա վերաբերյալ որոշումն անվավեր ճանաչելու մասին հայցապահանջը ենթակա չէ վարչական դատարանում քննության։