ԴԱՀԿ ապահովող ծառայությունը՝ ընդդեմ Ա. Պողոսյանի
10:55, July 11, 2016 | Մամլո հաղորդագրություններ
Տեղեկացնում ենք, որ 2016 թ. հուլիսի 11-ին՝ ժամը 16:00-ին, ՀՀ Վարչական դատարանում տեղի կունենա ՀՀ ԱՆ ԴԱՀԿ ապահովող ծառայության հայցի քննությունը՝ ընդդեմ Երևան քաղաքի բնակչուհի Ա. Պողոսյանի՝ վերջինիս, ՀՀ Վարչական իրավախատումների վերաբերյալ օրենսգրքի 2065 հոդվածի համաձայն, վարչական պատասխանատվության ենթարկելու պահանջի մասին:
Նշենք, որ ՀՀ Երևան քաղաքի Ավան և Նոր Նորք վարչական շրջանների ընդհանուր իրավասության դատարանի կողմից տրված կատարողական թերթիկի հիման վրա արգելանք է դրվել Ա. Պողոսյանին պատկանող գույքի և դրամական միջոցների վրա: Ինչպես նաև արգելվել է հիշյալ գույքի նկատմամբ որևէ գործողություն կատարելը: Ավելի ուշ պարզ է դարձել, որ նշված գույքն օգտագործվում է Ա. Պողոսյանի կողմից, որից հետո, ծանուցագրի համաձայն, վերջինս հրավիրվել է արգելանքի տակ դրված բնակարան՝ մասնակցելու կատարողական գործողություններին, սակայն Ա. Պողոսյանը նախ հրաժարվել է ներկայանալ, ապա ներկայանալով հրաժարվել է բացել դուռը՝ ապօրինի համարելով ՀՀ ԱՆ ԴԱՀԿ ապահովող ծառայության աշխատակիցների գործողությունները:
Հավելենք, որ ՀՔԱ Վանաձորի գրասենյակի կողմից Ա. Պողոսյանի դիմումի հիման վրա ներկայացված հանցագործության մասին հաղորդման առնչությամբ 2016 թ. ապրիլի 4-ին ՀՀ Հատուկ քննչական ծառայությունում հարուցվել է քրեական գործ՝ ՀՀ Քրեական օրենսգրքի 309-րդ հոդվածի 1-ին մասով ԴԱՀԿ ապահովող ծառայության աշխատակիցների կողմից պաշտոնեական լիազորություններն անցնելու դեպքի առթիվ: