Արթուր Սաքունց. Դատարան պետք է դիմեին ՀՀԿ շտաբները, քաղաքապետարանները ընդդեմ դպրոցի տնօրենների
15:50, April 12, 2017 | Այլ լրատվամիջոցներ, Նորություններ«Տնօրենները չպետք է դիմեին դատարան զրպարտության հիմքով»,- ապրիլի 12-ին «Մեդիա կենտրոնում» լրագրողների հետ հանդիպման ընթացքում ասաց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը:
Հիշեցնենք՝ Իրազեկ քաղաքացիների միավորում հասարակական կազմակերպությունը հրապարակել էր դպրոցի տնօրենների ձայնագրություններ, որտեղ տնօրենները խոստովանում էին, որ իշխող Հանրապետական կուսակցության համար ցուցակագրում են անում: 30 դպրոցի տնօրեններ այնուհետև դիմել են դատարան՝ Դանիել Իոաննիսյանից պահանջելով ներողություն խնդրել և որպես փոխհատուցում՝ յուրաքանչյուրին վճարել 2 միլիոն դրամ:
Արթուր Սաքունցի կարծիքով՝ նույն հայցով դատարաններ պետք է դիմեին Հանրապետական կուսակցության շտաբները, քաղաքապետարանները, համայնքապետարանները ընդդեմ տնօրենների. «Հանրապետական կուսակցության ղեկավարը շատ լավ հասկանում է, որ իրապես իրենք այդտեղ ուղղակի պատասխանատվություն ունեն, բայց չունեն խիզախություն հրապարակավ ընդունելու այդ պատասխանատվությունը: Սա խոսում է այն մասին, որ այդ քաջությունը չունենալով հանդերձ, ուրիշին՝ այդ տնօրեններին, գործիք դարձնելով փորձում են սեփական երեսը պարզել և աղավաղել պատկերը»:
Արթուր Սաքունցը նկատեց, որ Դանիել Իոաննիսյանի արածը նորություն չէ. «Մենք նախորդ ընտրությունների ժամանակ էլ գիտեինք, որ իշխող քաղաքական ուժը օգտագործում է վարչական ռեսուրսները, քրեական տարրերին մասնակից են դարձնում: Ուղղակի առաջին անգամ փաստագրվեց, և այս հանգամանքը իրենց հուզում է»:
Տես նաև՝ armtimes.com