Արման Անտոնյանի գործով. Սուսաննա Անտոնյանը՝ ընդդեմ ՀՀ Քննչական կոմիտեի Երևան քաղաքի քննչական վարչության
14:48, September 14, 2015 | Մամլո հաղորդագրություններՏեղեկացնում ենք, որ 2015թ. սեպտեմբերի 15-ին` ժամը 16:30-ին, Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանում տեղի կունենա Արման Անտոնյանի գործով հերթական դատական նիստը:
Ա. Անտոնյանը 2010թ. հունվարի 17-ից մինչ փետրվարի 27-ը չբերության գանգատով բուժման կուրս է անցել Երևանի «Սեքսոպաթոլոգիայի վերականգնողական քաղաքային կենտրոնում»: 2010թ. մարտ ամվսա վերջերին առողջական վիճակի կտրուկ վատթարացման պատճառով Ա. Անտոնյանը տեղափոխվել է Վանաձոր քաղաքի թիվ 1 հիվանդանոցային համալիր, ապա՝ ինֆեկցիոն հիվանդանոց, իսկ 2010 թ. ապրիլի 1-ին՝ անգիտակից, կոմային վիճակում տեղափոխվել է Երևան քաղաքի Նորքի ինֆեկցիոն հիվանդանոց, որտեղ էլ գիտակցության չգալով՝ մահացել է «հեպատիտ B» հիվանդությունից: Դեպքի առթիվ հարուցվել է քրեական գործ՝ բժշկական օգնություն և սպասարկում իրականացնողների կողմից մասնագիտական պարտականությունները չկատարելու կամ ոչ պատշաճ կատարելու՝ ՀՀ Քրեական օրենսգրքի 130-րդ հոդվածով նախատեսված հանցագործության հատկանիշներով, հետագայում հիշյալ գործի վարույթը կարճվել է: Վարույթն իրականացնող մարմնի որոշումը բողոքարկվել է նախ՝ վերադասության կարգով, ապա նաև՝ դատական կարգով: Բողոքարկման հիմք է հանդիսացել այն հանգամանքը, որ գործի նախաքննությունը չի կատարվել բազմակողմանի, լրիվ և օբյեկտիվ, ինչպես նաև կատարված քննությունը հասանելի չի եղել Ա. Անտոնյանի ընտանիքին: Առաջին ատյանի և Վերաքննիչ դատարանները գտել են, որ վարույթի շրջանակներում վարույթն իրականացնող մարմնի գործողությունները եղել են բազմակողմանի, լրիվ և օբյեկտիվ, որևէ խախտում թույլ չի տրվել: Վճռաբեկ դատարանը տուժողի իրավահաջորդ Սուսաննա Անտոնյանի ներկայացուցիչներ Արթուր Սաքունցի և Արայիկ Զալյանի կողմից ներկայացված բողոքի քննությունը վարույթ է ընդունել և կայացրել բողոքը բավարարելու մասին որոշում՝ արձանագրելով, որ քննությունը կատարվել է մի շարք խախտումներով և այն հասանելի չի եղել տուժողի ընտանիքին: Գործն ուղարկվել է նոր նախաքննության: Նախաքննության շրջանակներում վարույթն իրականացնող մարմինը, որոշ գործողություններ իրականացնելուց հետո, կայացրել է վարույթը կարճելու մասին որոշում:
ՀՔԱ Վանաձորի գրասենյակի ղեկավար, իրավապաշտպան Ա. Սաքունցի և գրասենյակի իրավաբան Ա. Զալյանի կողմից վերոնշյալ որոշումը բողոքարկվել է:
2015 թ. սեպտեմբերի 1-ին տեղի ունեցած դատական նիստը հետաձգվել էր՝ պայմանանվորված հավելյալ ուսումնասիրություններ կատարելու անհրաժեշտությամբ :
Տես նաև՝ hcav.am