2018 թ. ապրիլի 16-ին ցուցարարների նկատմամբ ոստիկանության կիրառած հատուկ միջոցների հետևանքով տուժածների մասին
13:43, April 17, 2018 | Նորություններ, Սեփական լրատվություն2018 թ. ապրիլի 16-ին Երևանի Բաղրամյան պողոտայում ոստիկանները հատուկ միջոցներ կիրառեցին, երբ ցուցարարները փորձում էին հաղթահարել փողոցի լայնքով տեղադրված փշալարերը և առաջ շարժվել դեպի ՀՀ Ազգային ժողովի շենք:
Այդ գործողությունների արդյունքում 46 անձ, այդ թվում՝ 6 ոստիկան, հոսպիտալացվել էր:
Հոսպիտալացված անձինք հիմնականում ստացել են ստորին վերջույթների վնասվածքներ:
Այս մասին հայտնել էր ՀՀ Առողջապահության նախարարությունը՝ ապրիլի 16-ի 16:30-ի դրությամբ:
Ավելի ուշ Առողջապահության նախարարությունը հայտարարեց, որ ժամը 19:00-ի դրությամբ Երևանի բժշկական կազմակերպություններում բուժումը շարունակում է 31 քաղաքացի։
ՀՀ Առողջապահության նախարարության փոխանցմամբ, ապրիլի 17-ի առավոտյան ժամը 9:00-ի դրությամբ բուժումը շարունակում է 12 անձ: Նրանց վիճակը գնահատվում է բավարար: