0 8000 12 11

Էջմիածնի քաղաքապետի ընտրությունների նախօրեին այդ քաղաքում տեղի ունեցած միջադեպը փաստում է, որ իշխող համակարգի բուն էությունը հանդիսանում են ոչ թե իրավական նորմերը, այլ ամեն գնով իշխանություն պահելու միտումն է կարևոր: Lragir.am-ի հետ զրույցում նման դիտարկում արեց իրավապաշտպան Արթուր Սաքունցը: Նա նկատում է, որ նոր Սահմանադրության ու բարեփոխված Ընտրական օրենսգրքի պայմաններում անցկացվող այս ընտրություններն ապացուցում են, որ ՀՀԿ համար ընտրություն ասվածը պայմանավորված է ոչ թե ընտրական նորմերով, այլ՝ ամեն գնով ու միջոցով իր իշխանության պահպանմամբ: Այսինքն՝ իրականում ոչինչ էլ չի փոխվել: «Եվ դա բնական է, որովհետև Մարտի 1-ի հանցագործությանը մինչև հիմա իրավական գնահատական տրված չէ»,- ասում է Սաքունցը: Հիշեցնենք, որ երեկ Էջմիածնում ՀՀԿ խմբակցության պատգամավոր, գեներալ Մանվել Գրիգորյանի որդու՝ Էջմիածնի գործող քաղաքապետ Կարեն Գրիգորյանի կողմնակիցների ու Էջմիածնի քաղաքապետի թեկնածու Արթուր Թումանյանի կողմնակիցների միջև միջադեպ է տեղի ունեցել, հնչել են կրակոցներ: Ըստ տեղեկությունների՝ կրակոցները հնչել են Կարեն Գրիգորյանի մեքենայի ուղղությամբ: Սակայն Արթուր Թումանյանը, ով ծեծվել է և հիվանդանոցում է, հայտարարել է, որ Կարեն Գրիգորյանն ու իր կողմնակիցները հետապնդել են իրենց ու ծեծի ենթարկել: Արթուր Սաքունցն ասում է, որ այսօր ունենք այն պատկերը, երբ իշխող քաղաքական կուսակցությունն իր հենարաններին՝ գեներալներին, օլիգարխներին և այլ որոշիչ ուժերին հնարավորություն է տվել, որպեսզի իրենք իրենց ֆեոդալական կալվածքներում իշխանության հաջորդականություն ապահովեն՝ իշխանությունը փոխանցեն իրենց ժառանգներին:

«Իշխանության պահպանման ՀՀԿ ամբողջ տրամաբանությունը հենվում է իր իսկ օլիգարխների ունեցած դե ֆակտո իշխանությունն իրենց ժառանգների միջոցով լեգիտիմացնելուն, իրավական կարգավիճակ տալուն: Եվ այդ իրավահաջորդության խնդիրը լուծում են իրենց բնորոշ մեթոդներով, որը կոչվում է բռնություն, ահաբեկչություն, իրավական տարրական նորմերի ոտնահարում: Եվ դրա հերթական դրսևորումներից մեկը հենց Էջմիածնի քաղաքապետի ընտրություններն են, երբ փորձել է ինչ-որ մեկը հանդգնել մրցակցության մեջ մտնել օլիգարխի ժառանգի հետ»,- նշեց նա: Ըստ իրավապաշտպանի՝ սա ապացուցում է, որ ՀՀԿ-ն իր նախագահի գլխավորությամբ թքած ունի ցանկացած ընտրական նորմերի և Ընտրական օրենսգրքի վրա: «Գեներալ Մանվելը, ով ժամանակին ՀՀԿ գործադիր մարմնում Սերժ Սարգսյանին ասել էր՝ մուրճն էլ է ձեր ձեռքին, մեխն էլ, ինքը չէր համարձակվի, ավելին, կկանխեր, որպեսզի նման գործողություն իրականացվեր, եթե համոզված չլիներ, որ մուրճ ու մեխ ունեցող անձի կողմից չունի աջակցություն՝ նման գործողություններ կատարելու համար: Այսինքն՝ գեներալ Մանվելն իր թագաժառանգին անպայման կսաստեր, եթե աջակցություն չունենար նման գործողությունների կատարման համար: Իսկ դա նշանակում է, որ հուլիսյան զինված դեպքերից բացարձակապես դաս չի քաղել Սերժ Սարգսյանը»,- հավալեց նա: Դատելով այսօրվա պատկերից, ըստ Սաքունցի, արդեն պարզ է, որ այս վիճակը լինելու է նաև 2017 թվականի ապրիլին՝ խորհրդարանական ընտրությունների ժամանակ: Եվ ոչ մի փոփոխված Սահմանադրություն ու Ընտրական օրենսգիրք չեն կարող բարելավել իրավիճակը: «Ես այս դեպքի հետ կապված ակնկալում եմ Ընտրական օրենսգրքի փոփոխությունների շուրջ համաձայնություն ստորագրած բոլոր քաղաքական ուժերի հստակ գնահատականները: Եվ ըստ այդ գնահատականների՝ արդեն կարող ենք կարծիք կազմել, թե համաձայնությունն իրականում ինչի շուրջ է եղել»,- ասաց նա:

lragir.am