ԱԱԾ-ն իրավասու է քրգործ հարուցել Գլխավոր դատախազի նկատմամբ՝ անգործության և հանցագործությունների կոծկման հիմքով
19:25, May 18, 2018 | Այլ լրատվամիջոցներ, Նորություններ
Օր առաջ քաղբանտարկյալները պետք է ազատ արձակվեն, բազմիցս հայտարարել է վարչապետ Նիկոլ Փաշինյանը, մինչդեռ Գլխավոր դատախազ Արթուր Դավթյանը հակադիր տեսակետն է արտահայտում․ «Հայաստանում չկան քաղբանտարկյալներ»,- օրերս ասել է նա։ Ի՞նչ ավարտ պետք է ունենա կարծիքների այս բախումը և ինչ ճանապարհով պիտի ազատ արձակվեն քաղբանտարկյալները։
Իրավապաշտպանների գնահատմամբ՝ այս հակասությունը պետք է լուծվի գլխավոր դատախազի պաշտոնանկությամբ․ «Առկա են բավարար իրավական հիմքեր, որպեսզի Գլխավոր դատախազ Արթուր Դավթյանը հրաժարական տա»,- հայտարարում են իրավապաշտպան Արթուր Սաքունցը և փաստաբան Մուշեղ Շուշանյանը։
Կառավարությունն իրավասու է աշխատանքից հեռացնել Հատուկ քննչական ծառայության և Քննչական կոմիտեի պետերին։ Աղվան Հովսեփյանի և Վահրամ Շահինյանի փոխարինումը նոր կադրերով ընդամենը ժամանակի հարց է։ Որպես ՀՀԿ-ի իշխանությանը ծառայած պաշտոնյա, Վճռաբեկ դատարանի նախագահ Արման Մկրտումյանը ևս պետք է մտածի ճամպրուկները հավաքելու մասին։ Գլխավոր դատախազ Արթուր Դավթյանի հեռացումը հնարավոր է Ազգային ժողովի մեծամասնության համաձայնությամբ։ Հաշվի առնելով ՀՀԿ մեծամասնության գործոնը, այդ սցենարը պետք է բացառել։
Սակայն իրավապաշտպանները համոզված են՝ կան բավարար հիմքեր, որպեսզի Արթուր Դավթյանը պաշտոնին հրաժարական տա օրինական ճանապարհով։ 2008 թվականի մարտի 1-ին Երևանի կենտրոնում 10 մարդու սպանության հանգամանքների չբացահայտումն ու մեղավորներին ի հայտ չբերելը Գլխավոր դատախազին պաշտոնանկ անելու հիմքերից մեկն է։ Արթուր Սաքունցը հիշեցնում է Արթուր Դավթյանի խոսքը, թե Մարտի 1-ի բացահայտման համար անհրաժեշտ է հանրության աջակցությունը։ Այսպիսի հայտարարությունն ինքնին իրավապաշտպանին համոզիչ չի թվում․
«Սրանով իսկ պարոն Դավթյանը ստորագրել է իր անգործությունը և անճարունակությունը, որովհետև Մարտի 1-ի հանցագործության վերաբերյալ հանրությունն արդեն իսկ վկայություն է տվել՝ բոլոր տեսանյութերն ու կադրերը Դավթյանի ձեռքում են»։ Արթուր Դավթյանի անգործության մասին վկայող ևս մեկ հանգամանք է հայտարարությունը, թե Ռոբերտ Քոչարյանին հարցաքննելու հիմքեր չկան․ «Գլխավոր դատախազն իր գործելակերպով չի նպաստում Մարտի 1-ի պետական ահաբեկչության բացահայտմանը և իրավական գնահատական տալուն։ Ավելի խիստ՝ շարունակում է կոծկել հանցագործությունը։ Գլխավոր դատախազի նկատմամբ անհրաժեշտ է քրեական հետապնդում սկսել՝ հանցագործության կոծկման հիմքով»- ասում է Արթուր Սաքունցը։
Փաստաբան Մուշեղ Շուշանյանը համակարծիք է պարոն Սաքունցի հետ։ Այն, որ դատաիրավական համակարգը դիմադրում է և քաղբանտարկյալները ազատ չեն արձակվում, իր մեղավորությունն ունի հենց Գլխավոր դատախազությունը։ Այս կառույցը դատաիրավական համակարգի մյուս կառույցների հետ միասին ձևավորվել և դեռևս գործում են Հանրապետական կուսակցության ազդեցության ներքո։
Փաստաբանի խոսքով՝ Արթուր Դավթյանը պաշտոնից պետք է հեռանար դեռ ապրիլի 23-ին, կամ առնվազն՝ մայիսի 8-ին։ Եվ չնայած, որ կա Գլխավոր դատախազի հեռացման հանրային պահանջ, նա շարունակում է պաշտոնավարել։ Իսկ ի՞նչ ելք է տեսնում այս իրավիճակում Մուշեղ Շուշանյանը․
«Ես գտնում եմ, որ ժողովուրդը պետք է իր կամքը արտահայտի և խաղաղ ձևով պարտադրի, որպեսզի գլխավոր դատախազը հրաժարական ներկայացնի։ Որովհետև իշխանության տերը և աղբյուրը ժողովուրդն է, որն իր իշխանությունը կարող է իրականացնել ուղիղ ձևով։ Խաղաղ անհնազանդության ակցիաների միջոցով Դատախազության շենքը պետք է շրջափակվի»։
Մուշեղ Շուշանյանի գնահատմամբ՝ Գլխավոր դատախազը և նրա ղեկավարած կառույցը մասնակիցն են եղել Սերժ Սարգսյանի վարչախմբի իրականացրած հանցագործությունների, ինչը հեռացման բավարար հիմք է․ «Իրենք եղել են քաղաքական հետապնդման ենթարկվող անձանց գործերով հաշվեհարդարի գործիք, նաև՝ հրաժարվել են քրեական հետապնդում հարուցել բազմաթիվ այլ գործերով, որոնցում ենթադրյալ հանցանքները կատարել են վարչախմբի ներկայացուցիչները կամ նրանց մերձավոր ազգականները։ Դատախազությունը ծայրից ծայր հանցագործությունների մեջ ներքաշված կառույց է»,- ասում է փաստաբանը։
Արթուր Սաքունցը հավելում է․ «Արթուր Դավթյանը հրապարակավ հերքում է, որ Հայաստանում կան քաղաքական բանտարկյալներ, բայց ո՞վ, եթե ոչ Արթուր Դավթյանը լավ գիտի, որ ՀՀԿ-ի իշխանությունը քաղաքական նպատակահարմարությունից ելնելով անմեղ մարդկանց զրկել է ազատությունից։ Արթուր Դավթյանը շաբաթը մեկ Սերժ Սարգսյանին զեկույցներ էր ներկայացնում իրավիճակի վերաբերյալ։ Սա այն դեպքում, երբ դատախազությունը անկախ մարմին է, ընտրվում է Ազգային ժողովի կողմից և հաշվետու է բացառապես խորհրդարանի առաջ և ոչ՝ Սերժ Սարգսյանի»։
Վերոգրյալ փաստերը հաշվի առնելով, իրավապաշտպանը եզրակացնում է՝ օրինականությունը վերականգնելու հստակ ճանապարհ կա, որով պետք է առաջնորդվել․
«Ազգային անվտանգության ծառայությունն իրավասու է քրեական գործ հարուցել Գլխավոր դատախազի նկատմամբ՝ ապօրինության, անգործության և հանցագործությունների կոծկման հիմքով։ Այդ հիմքերից է ոչ միայն Մարտի 1-ի գործի չբացահայտումը, այլև հենց քաղաքական հետապնդումների մասին հերքումը»։ Իրավիճակն աբսուրդային է, ասում է Մուշեղ Շուշանյանը, թվում է՝ ժողովուրդը հաղթանակ է տոնել, բայց մենք շարունակում ենք ունենալ քաղաքական բանտարկյալներ․
«Սա օր առաջ լուծում պահանջող խնդիր է»։ Փաստաբանն ասում է, որ պետք է ստեղծել նոր դատախազություն․ «Արթուր Դավթյանի հեռացումից հետո ժողովրդի կամքով ընտրված նոր դատախազը պետք է հին կառույցը փոխի»։ Միայն այսպիսի քայլերի դեպքում կարելի է հուսալ, որ քաղբանտարկյալներն ազատ կարձակվեն և վերջապես արդարադատական համակարգը կվերագտնի իր ազատությունը։