«Ցինիկ գնահատականներ են, երբ ասում են՝ աշխարհում ճգնաժամ է, մեզ մոտ էլ. մենք ի՞նչ մեղք ունենք»
17:58, December 19, 2014 | Այլ լրատվամիջոցներ, Նորություններ
Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցն անդրադառնալով Հայաստանում դրամի արժեզրկմանը եւ դոլարի արժեվորմանը, նշեց, որ համաշխարհային շուկայում էներգակիրների գները, դրանց տատանումները մշտապես ազդել են արտարժույթի վրա:
«Ասպարեզի» հետ զրույցում նա ասաց.«Խնդիրն այն է, որ իշխանությունը պետք է կարողանա ձեւավորել պատշաճ ռեսուրսներ այդ տատանումները վերահսկելու եւ կարգավորելու համար: Նման դեպքերում անհրաժեշտ է ցուցաբերել համակարգային մոտեցում: Խոսքը տնտեսական ազատությունների խթանմանն է վերաբերում, նաեւ արտաքին քաղաքականության այնպիսի դաշտի ձեւավորմանը, որ կարողանաս քո երկրի տնտեսական զարգացման համար նպաստավոր պայմաններ ստեղծել եւ գրավիչ դարձնել այլ երկրների ներդրողների համար: Պետք է ունենալ անկախ դատական իշխանություն, կարեւոր է նաեւ տրանսպորտային կոմունիկացիաների արդիականացումը: Մինչդեռ, այժմ մեր տնտեսությունը մոնոպոլիզացված է եւ ՀՀ իշխանությունների արտաքին քաղաքականությունն էլ նպատակաուղղված է մեր երկրին այնպիսի փակ տարածքում ընկղմելու, ինչպիսին ԵՏՄ-ն է»:
Այսինքն, մենք տնտեսություն չունենք, դրա համա՞ր է դրամն անկում ապրում, հարցրեցի զրուցակցիս: «Նույն ԱՄՆ դոլարի գնողունակությունը, եթե նայենք մի 20-30 տարի առաջ, այժմ փոխվել է: Խնդիրն ազգային արժույթի էժանացման կամ թանկացման մեջ չէ, այլ նրանում է, թե դու քո տնտեսական զարգացումներին համաչափ լուծում տալի՞ս ես, որպեսզի տեխնոլոգիական զարգացում ապահովվի: Խնդիրն այն է, որ քո երկրի տնտեսությունն աշխատող չէ՝ նման մարտահրավերներին դիմագրավելու համար. նշանակում է՝ հիվանդ է: Խրոնիկ հիվանդությունն էլ կարող է այնքան սրվի, որ քեզ սպանի, ուստի, չպետք է թողնել, որ այն խորանա: Ցինիկ գնահատականներ են, երբ ասում են՝ աշխարհում ճգնաժամ է, մեզ մոտ էլ, մենք ի՞նչ մեղք ունենք: Աշխարհի շատ երկրների ղեկավարներ իրենց բնակչությանը բացատրում են, թե ճգնաժամն ինչի հետեւանք է, իսկ այստեղ պատասխան չունեն: Այստեղ իմիտացիոն փսիխոթերապիա պետք չէ, որ մարդկանց ասեն՝ մի մատնվեք խուճապի: Ասելով չէ, կա ռեալ տնտեսական վիճակ, երբ մարդիկ հասկանում են՝ վիճակը փոխելու համար որեւէ քայլ չի կատարվում: Տիգրան Սարգսյանի ժամանակ էլ ասում էին՝ ճգնաժամի մասին մի խոսեք, որքան շատ եք խոսում, այնքան այն մեծանում է: Այժմ կառավարությունը չի էլ կարող աշխատել, քանի որ ամբողջ գործունեությունն ուղղված է օլիգարխիկ, քրեական համակարգի սպասարկմանը»:
Ա.Սաքունցին հարցրեցի՝ Հայաստանում գործող որոշ ռուսական ընկերություններ վնասով են աշխատում, ինչու՞ պետք է վնասի փոխհատուցումը մեր պետբյուջեից լինի: «Ես չգիտեմ, թե ինչի համար: Հայաստանը նմանվում է ՌԴ ինչ-որ շրջանի, հետեւաբար, իր ռեգիոնների հաշվին, Ռուսաստանն ինչ-ինչ խնիրներ է լուծում: Այն, ինչ այժմ Հայաստանում տեղի է ունենում, հանցագործ տնտեսական, արտաքին քաղաքականության արդյունք է, որի հետեւանքները մենք այժմ զգում ենք: Փոխանակ այս իրավիճակը լուրջ քննարկումների առարկա դառնա, ես տեսնում եմ, որ ԱԺ քաղաքական ուժերը դրան բավական լոյալ են մոտենում: Այժմ այն ժամանակն էր, որ առնվազն պետք է Սերժ Սարգսյանի հրաժարականը պահանջեին»:
Ըստ իրավապաշտպանի, մենք համակարգային ճգնաժամի մեջ ենք գտնվում: «Մնացել է երկու ինստիտուտ, որոնք ինչ-որ ձեւով փորձում են իրենց վրա որոշակի պատասխանատվություն վերցնել. մեկը ՀՀ պաշտպանության նախարարությունն է, մյուսը՝ ոստիկանությունը: Եթե ոստիկանությունը չլինի, ընդհանրապես բեսպրեդել կլինի, կրիմինալը կուտի երկիրը. 1990-1991 թվականների անցումային ժամանակների նման, երբ ոստիկաններ չկային, բանակ չկար: Բանակն էլ այսօր մեր անվտանգությունն է ապահովում, ինչը փաստ է: Այն, որ կա լիսկաների, զոռբաների խնդիր, դա քաղաքական համակարգի խնդիրն է, քանի որ կա անձեռնմխելիների եւ գլխավոր կոռուպցիոներների մի ինստիտուտ, որին ոստիկանությանը կամ իրավապահ համակարգին արգելված է մոտենալ: Բայց այժմ այդ երկու ինստիտուտներն են, որ ինչ-որ նվազագույն պահպանման գործառույթ են իրականացնում»,-հավելեց Ա.Սաքունցը:
Վերջում նա նշեց, որ այսօր առողջապահությունը չի աշխատում, կրթական համակարգը ճգնաժամի մեջ է, գյուղատնտեսության նախարարությունը գնում, տերտեր է բերում, որ անձրեւ կամ կարկուտ չգա:
Աղբյուրը` www.asparez.am