0 8000 12 11

Գյումրիում սպանված Ավետիսյանների  իրավահաջորդների ներկայացուցիչներից Արթուր Սաքունցը առաջիկայում պատրաստվում է Հայաստանի քննչական կոմիտեին երկու միջնորդություն ներկայացնել: Այս մասին Newsline-ի հետ զրույցում ասաց Սաքունցը:

«Պատրաստվում ենք միջնորդել, որ սահմանը խախտելու փորձի փաստի հիման վրա քրեական գործ հարուրցվի: Բացի այդ, արդեն ակնհայտ է, որ Վալերի Պերմյակովի ռուսական իրավապահ մարմինների հսկողության տակ գտնվելը խոչընդոտում է Հայաստանի իրավապահ մարմինների կողմից գործի օբյեկտիվ, բազմակողմանի ու լրիվ քննությունը, և հետևաբար՝ մենք միջնորդելու ենք, որ Հայաստանի քննչական մարմին կողմից Պերմյակովի նկատմամբ խափանման միջոց կիրառվի»,- ասաց Արթուր Սաքունցը:

Մեր ճշտող հարցին՝ այսինքն՝ միջնորդությունն, ըստ էության, վերաբերում է Պերմյակովին հայկական կողմիցն հանձնելուն, Սաքունցը պատասխանեց, որ իրենց միջնորդությունն ուղղված է Հայաստանի քննչական կոմիտեին և քննության նկատմամբ վերահսկողություն ունեցող ՀՀ գլխավոր դատախազությունը:

Սպանության մեջ մեղադրվում է Գյումրիի ռուսական 102-րդ ռազմակայանի ռուս զինծառայող Վալերի Պավլովիչ Պերմյակովը, ով հունվարի 13-ին հայտնաբերվել էր ռուս սահմանապահների կողմից՝ Թուրքական սահման անցնելու փորձ կատարելիս: Վերջինս ցուցմունք է տվել և ընդունել իր մեղքը: Գործի  նախաքննությունը շարունակվում է: Պերմյակովը գտնվում է Ռուս իրավապահների հսկողության տակ:

Աղբյուրը՝newsline.am