0 8000 12 11

2014թ. դեկտեմբերից Հելսինկյան Քաղաքացիական Ասամբլեայի Վանաձորի գրասենյակն իրականացնում է «Ոստիկանության հետ հարաբերություններում քաղաքացիների իրավունքների պաշտպանության արդյունավետության բարձրացում» եռամյա ծրագիրը:

Ծրագրի նպատակն է բարձրացնել ոստիկանության հետ հարաբերություններում քաղաքացիների իրավունքների պաշտպանության արդյունավետությունը ուսումնասիրությունների և գործնական աշխատանքների միջոցով, որոնք, գլխավոր խնդիրների և նրանց պատճառների բացահայտմանն ուղղված համապարփակ մոտեցում ապահովելով, կազմակերպությանը թույլ կտան անհատական և համակարգային մակարդակներում ավելի արդյունավետ կերպով պաշտպանել քաղաքացիների իրավունքները:

Ծրագրի թիրախային խմբերն են.

• ոստիկանությունը
• ոստիկանության աշխատակիցների անօրինական գործողություններից տուժած քաղաքացիները
• երիտասարդները
• հասարակությունն ընդհանուր առմամբ

Ծրագրի բաղադրիչներն են.

• Իրավապահ մարմինների կամայականության համաթիվը[1] հաշվելու նպատակով սոցիոլոգիական հարցման իրականացում

Նախատեսվում է համակողմանիորեն ուսումնասիրել իրավապահ մարմիններ-քաղաքացիներ հարաբերություններում առկա խնդիրները, վերհանել դրանք և ներկայացնել հանրային լայն քննարկման: Մասնավորապես` ծրագրի առաջին տարում հանրապետության բոլոր մարզերում և Երևանում կիրականացվի սոցիոլոգիական հարցում` իրավապահ մարմինների գործունեության վերաբերյալ հանրության կարծիքը պարզելու համար: Տարեվերջին ուսումնասիրության արդյունքները կամփոփվեն զեկույցի տեսքով, որը կտեղադրվի կազմակերպության կայքում. մամուլի ասուլիսների և այլ տեղեկատվական արշավների միջոցով զեկույցը կներկայացվի հանրության ուշադրությանը:

• ԶԼՄ-ների մշտադիտարկում և տեսահաշվետվության պատրաստում

Ոստիկանություն–քաղաքացի հարաբերություններում առկա խախտումների դեպքերը գրանցելու և համակարգված կերպով ներկայացնելու նպատակով կիրականացվի ԶԼՄ-ների մշտադիտարկում, ինչպես նաև կպատրաստվի և հանրությանը կներկայացվի տեսահաշվետվություն:

• Իրավական աջակցության տրամադրում

Ծրագրի ողջ ընթացքում իրավապահ մարմինների անօրինական գործողություններից տուժած քաղաքացիներին կտրամադրվի անվճար իրավաբանական խորհրդատվություն թե՛ գրավոր, թե՛ բանավոր ընթացակարգերով: Նախատեսվում է նաև ռազմավարական դատավարությունների միջոցով նախադեպերի ստեղծում:

• Իրավաբանական կլինիկա

2015թ. մայիս–օգոստոս ամիսներին մրցույթի արդյունքում ընտրված երիտասարդ իրավաբանների համար կկազմակերպվեն կարողությունների զարգացմանն ուղղված դասընթացներ և գործնական հանդիպումներ, որոնց ընթացքում փորձառու իրավաբաններն իրենց գիտելիքներով և փորձով կկիսվեն երիտասարդ մասնագետների հետ: Հայտադիմումների ընդունման մասին հայտարարության տարածումից հետո չափանիշներին համապատասխանող բոլոր հետաքրքրված անձինք հնարավորություն կունենան դիմելու կլինիկային մասնակցելու համար:

Ծրագիրը ֆինանսավորվում է Նորվեգիայի հելսինկյան կոմիտեի կողմից:

­­­­­­­­­____________________

____

Եթե ոստիկանության աշխատակիցների  կողմից խախտվել են Ձեր իրավունքները, կարող եք դիմել ՀՔԱ Վանաձորի գրասենյակ յուրաքանչյուր աշխատանքային օր՝ ժամը 10:00-18:00-ն:

Հասցե՝ ք. Վանաձոր, Տիգրան Մեծի 59

Հեռ. +374 322 4 22 68,

Անվճար թեժ հեռախոսագիծ  0 8000 12 11

[1] Նախկինում ՀՔԱ Վանաձորի գրասենյակը հրապարակել է «Իրավապահ մարմինների կամայականության համաթիվը ՀՀ հյուսիսային մարզերում» զեկույցը, որում ամփոփված են 2013թ. ապրիլ-մայիս ամիսների ընթացքում ՀՀ Լոռու, Տավուշի և Շիրակի մարզերում ՀՔԱ Վանաձորի գրասենյակի կողմից իրականացված փորձնական սոցիոլոգիական հարցման արդյունքները: Այս ծրագրի շրջանակներում նախատեսվում է նախորդ հարցման ընթացքում փորձարկված գործիքակազմի միջոցով հարցում իրականացնել հանրապետության ողջ տարածքում: