Հայաստանում երկիշխանություն է. Բացառիկ իրավիճակ
16:09, April 28, 2018 | Այլ լրատվամիջոցներ, Նորություններ
Հայաստանում ձևավորվել է երկիշխանություն՝ մեկը դե յուրե իշխանությունն է՝ հանձինս իշխանության լծակներին տիրապետող ՀՀԿ-ի, մյուսը՝ ունենք դե ֆակտո իշխանություն՝ հանձինս Նիկոլ Փաշինյանի և նրա թիմի: Եվ այս երկակի վիճակը երկար շարունակվել չի կարող, քանի որ ձևական և փաստացի իշխանությունները պետք է անպայման ինչ-որ մի կետում վերանան: Եվ դա պետք է լինի անցումային կառավարության ձևավորմամբ, որի սկիզբը սպասվում է մայիսի մեկին: Lragir.am-ի հետ զրույցում այս մասին ասաց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը:
Նրա խոսքով՝ բովանդակային իմաստով ունենք մի պատկեր, որ եթե ՀՀ քարտեզի վրա նշենք բոլոր այն բնակավայրերը, որտեղ իրականացվել են քաղաքացիական անհնազանդության բացառիկ խաղաղ ու ոչ բռնի ակցիաներ, ապա Հայաստանի ամբողջ քարտեզը կծածկվի այդ ակցիաների պատկերով:
«Այսինքն՝ սա փաստում է, որ փաստացի իշխանությունն իրականում բխում է Սահմանադրության երկրորդ հոդվածից, որ իշխանությունը պատկանում է ժողովրդին, ինչն առավել քան ակնառու ու իրական է: Իսկ քաղաքական կայուն մեծամասնություն հանդես եկող կուսակցությունն ունի ընդամենը մանդատներ, թվաբանական մեծամասնական, որը ամրապնդված չէ Սահմանդրության երկրորդ հոդվածով»,- ասաց նա:Ըստ Սաքունցի՝ այս ժամանակահատվածը նաև լուրջ փորձություն է բոլոր քաղաքական ուժերի համար, փորձություն այն տեսակետից, թե ինչքանով են իրենք պահպանելու իրենց՝ որպես ՀՀ քաղաքական կուսակցություն հանդես գալու թե բարոյական, թե քաղաքական իրավասությունը: Այսինքն՝ նրանք քննություն են անցնելու բոլորի աչքի առաջ, թե արդյոք իրենք հանդես են գալու կամ կարող են հավակնել, որ հանդիսանում են ՀՀ քաղաքացիների շահերն արտահայտողներ: Սա, ըստ նրա, հարց է, որը դրված է այնպես հրապարակային, որ որևէ քաղաքական մանիպուլյացիայի, ստվերային համաձայնությունների կամ գործընթացի տեղ չի մնում:
«Մերկացված է ամբողջ քաղաքական դաշտը՝ շնորհիվ այս շարժման: Եվ այս հրապարակային մերկությունը մի կողմից պատասխանատվություն է ենթադրում այն կուսակցությունների կողմից, որոնք մանդատների շնորհիվ ունեն որոշում կայացնելու իրավասություն, բայց մյուս կողմից այդ որոշումների բովանդակային տեսակետից իրենց իրավասությունը պետք է հիմնվի քաղաքացիների ակնկալիքների վրա: Եվ այս առումով այդ մանդատների կրողների պատասխանատվությունն առավել քան մեծանում է»,- նշեց նա:Արթուր Սաքունցի խոսքով՝ այս պարագայում այն, ինչ հռչակվել է խաղաղ, անցնցում անցում դեպի խորհրդարանական արտահերթ ընտրությունների, ստուգարք է հանդիսանում այդ քաղաքական ուժերի համար: Հանրությունը մինչ այժմ, չնայած բազմաթիվ փորձերին, հավատարիմ է մնացել ոչ բռնի, խաղաղ մեթոդներով իրենց բողոքն ու անհնազանդությունն արտահայտելու քաղաքացիական սկզբունքներին: Եվ, չնայած բազմահազարանոց այս բողոքի ցույցերին, այնուամենայնիվ, շարժման ղեկավարությունը և քաղաքացիներն իրենց ամենօրյա գործողություններում ու ձգտումներում կարողացել են համոզիչ լինել:
“Մայիսի մեկին ընդառաջ, կարծում եմ, որ որևէ քաղաքական պայմանավորվածություն, դիրքորոշում չի կարող լինել լեգիտիմ՝ առանց հրապարակային լինելու: Ստվերային բոլոր այն պայմանավորվածությունները, որոնք կարող են չարտահայտել քաղաքացիների ակնկալիքները, դրանք կհանգեցնեն լարվածության: Եվ այս առումով հնարավոր լարվածության պատասխանատվությունը կրելու են քաղաքական ուժերը, որովհետև առաջին անգամ նրանք ստիպված են լինելու հաշվի նստել Սահմանադրության երկրորդ հոդվածով սահմանված որպես ժողովրդի իշխանության պահանջի կատարողներ”,- ասաց նա:Ըստ Սաքունցի՝ սա եզակի իրավիճակ է աշխարհում, որում այսօր Հայաստանն ու հայ ժողովուրդը գտնվում են: Եվ այս առումով, բացառիկ աննախադեպ է վարչապետի պաշտոնակատար հանդես եկող Կարեն Կարապետյանի՝ արտաքին աշխարհքաղաքական կենտրոնի ներգրավմամբ խնդիրները լուծելու փորձը:“Ինքը պետք է հրապարակավ հայտարարի, որ նման փորձեր չի անում, լռության շարունակությունը կհիմնավորի նման կասկածները: Շարժումը, ի դեմս Նիկոլ Փաշինյանի, հայտարարեց, որ սրանք միայն ներհայաստանյան գործընթացներ են: Այս սկզբունքի պահպանումը միակ երաշխիքն է, որ հետագայում որևէ լարվածություն չի կարող լինել”,- ընդգծեց նա:
Մայիսի մեկին, ըստ նրա, ՀՀԿ-ն, որը բազմիցս իրեն հայտարարել է որպես պատասխանատու քաղաքական ուժ, պետք է պատասխանատվությամբ մոտենա իրավիճակին և քվեարկի Նիկոլ Փաշինյանի թեկնածության օգտին: