Ոստիկանությունը պահանջում է վարչական պատասխանատվության ենթարկել ևս երկու ցուցարարի
17:11, November 29, 2016 | Մամլո հաղորդագրություններ
Տեղեկացնում ենք, որ 2016 թ. նոյեմբերի 30-ին՝ ժամը 11:00-ին, ՀՀ Վարչական դատարանում նշանակված է 2016 թ. մարտի 23-ին Գևորգ Սաֆարյանի կալանքի ժամկետը երկարաձգելու վերաբերյալ միջնորդության քննարկմանն ընդառաջ կազմակերպված հավաքի մասնակից Արմեն Միքայելյանի գործով դատական նիստ:
Նույն օրը՝ ժամը 12:00-ին, ՀՀ Վարչական դատարանում նշանակված է հավաքի մեկ այլ մասնակից Հովհաննես Ղազարյանի գործով դատական նիստ:
Դատարան ներկայացված հայցով ՀՀ Ոստիկանությունը պահանջել է վարչական պատասխանատվության ենթարկել հավաքի մասնակիցներին՝ ՀՀ Վարչական իրավախախտումների վերաբերյալ օրենսգրքի 180.1-րդ հոդվածի (Հավաքներ անցկացնելու` օրենքով սահմանված կարգը խախտելը) 11-րդ և 15-րդ կետերի պահանջներով:
Հիշեցնենք՝ հավաքի մի շարք մասնակիցներ ֆիզիկական ուժի գործադրմամբ բերման էին ենթարկվել և տեղափոխվել ՀՀ Ոստիկանության Երևան քաղաքի վարչության Կենտրոնականի բաժին, որտեղ նրանց նկատմամբ իրականացվել էր վարչական վարույթ՝ հավաքի մասնակցի կողմից իր պարտականությունները չկատարելու ու հավաքի խաղաղ և բնականոն ընթացքի ապահովման վերաբերյալ ոստիկանության` օրենքով սահմանված պահանջները չկատարելու հիմքով: