Կեղծ ընթերակաների գործով ՀՀ գլխավոր դատախազին դիմում-բողոք է ուղարկվել
18:03, January 30, 2015 | Նորություններ, Սեփական լրատվություն | Արդար դատաքննության իրավունք | ՀՀ Հատուկ Քննչական Ծառայություն, Ոստիկանություն
2014 թ. օգոստոսի 2-ին իր իրավունքների պաշտպանության համար ՀՔԱ Վանաձորի գրասենյակ էր դիմել Վանաձորի բնակչուհի Փնջիկ Թերոյանը, ով հայտնել էր, որ 2012 թ. ապրիլի 4-ին հանցագործության մասին հաղորդում է ներկայացրել ՀՀ ոստիկանւթյուն: Հաղորդման հիման վրա ՀՀ ոստիկանության Լոռու մարզի քննչական բաժնի Վանաձոր քաղաքի Տարոնի քննչական բաժանմունքում հարուցվել է քրեական գործ: Փ. Թերոյանը հայտնել է, որ իրականացված քննչական գործողությունների ժամանակ քննիչի կողմից թույլ են տրվել մի շարք խախտումներ, մասնավորապես քննչական գործողություններում որպես ընթերականեր ընդգրկվել են ոստիկանության աշխատակիցները :
Ինչպես արդեն հայտնել էինք, վերոհիշյալ խախտումների վերաբերյալ հանցագործության մասին հաղորդում էր ուղարկվել ՀՀ հատուկ քննչական ծառայություն, պահանջվել էր ձեռնարկել անհրաժեշտ միջոցներ՝ ներկայացված հանցագործությունը բացահայտելու և այն կատարած անձանց պատասխանատվության ենթարկելու ուղղությամբ:
2014 թ. սեպտեմբերի 20-ին կազմակերպությունը ստացավ ՀՀ ՀՔԾ որոշումը՝ քրեական գործի հարուցումը մերժելու մասին;
2014 թ. սեպտեմբերի 27-ին ՀՔԱ Վանաձորի գրասենյակը դիմում-բողոք ուղարկեց ՀՀ գլխավոր դատախազին ՀՀ ՀՔԾ որոշումը վերացնելու և քրեական գործ հարուցելու պահանջով:
2014 թ. հոկտեմբերի 23-ին ՀՀ գլխավոր դատախազը պատասխան գրությամբ հայտնել է, որ կազմակերպության բողոքը բավարարվել է, հարուցվել է քրեական գործ և այն ուղարկվել է նոր քննության, սակայն ՀՀգլխավոր դատախազի կողմից բողոքի բավարարումը հիմք չհանդիսացավ կատարված հանցագործության բացահայտման համար։
2014 թ. դեկտեմբերի 26-ին ՀՀ ՀՔԾ ՀԿԳ քննիչ Ա. Մինասյանը կայացրեց որոշում քրեական հետապնդում չիրականացնելու և քրեական գործով վարույթը կարճելու մասին:
Այս որոշումը ՀՔԱ Վանաձորի գրասենյակը ստացել է 2015 թ. հունվարի 16-ին և հենց նույն օրը Փնջիկ Թերոյանը ՀՀ գլխավոր դատախազության շենքի դիմաց սկսեց հացադուլ՝ պահանջելով իրականացնել պատշաճ քննություն:
2015 թ. հունվարի 22-ին ՀՔԱ Վանաձորի գրասենյակը ևս մեկ անգամ դիմում-բողոք է ներկայացրել ՀՀ գլխավոր դատախազին՝ պահանջով վերացնել ՀՀ հատուկ քննչական ծառայության՝ քրեկան հետապնդումը չիրականացնելու և քրեական գործի վարույթը կարճելու մասին որոշումը և գործն ուղարկել նոր քննության:
Կարծում ենք, որ այս անգամ ևս ՀՀ գլխավոր դատախազությունը կբավարարի կազմակերպության դիմումը, իսկ ՀՀ ՀՔԾ-ն կիրականացնի բազմակողմանի, օբյեկտիվ և լրիվ քննություն, հիմնվելով ոչ միայն ոստիկանության աշխատակիցների և քննիչների, այլ նաև քննչական գործողություններին մասնակցած մյուս անձանց ցուցմունքների, և գործի օբյեկտիվ հանգամանքները պարզելու հիման վրա: