0 8000 12 11

ՀՀ ԱՆ քրեակատարողական հիմնարկներում և մարմիններում հասարակական վերահսկողություն իրականացնող հասարակական դիտորդների խմբի նախագահ Արայիկ Զալյանն այսօր լրագրողների հետ զրույցում անդրադարձավ Արդարադատության նախարարության կողմից ՔԿՀ-ներում կատարած աշխատանքին:

Նա նշեց, որ թեև արձանագրվել է «Նուբարաշեն» ՔԿՀ-ի առաջին հարկում գտնվող որոշակի խցերի փակման հարցով դրական լուծում, ինչը  բավականին մեծ խնդիր էր, բայց այդ խնդիրն անգամ իսպառ չի վերացել: «Դեռևս որոշակի խցեր կան հացադուլավորների համար նախատեսված, որոնք գտնվում են առաջին հարկում, որտեղ պայմաններ ուղղակի չկան: Խնդիրներ ունենք ինքնասպանությունների, ինքնավնասումների, մահվան դեպքերի հետ կապված: 2016թ-ին մոտավորապես 850-860 ինքնավնասման դեպք է գրանցվել»,-ասաց նա:

Արայիկ Զալյանն ասաց, որ երբ ինքնավնասումների, ինքնասպանության փորձերի և մահվան դեպքերով քննությունները չեն հանգեցնում մեղավորների բացահայտման, դա արդեն նպաստում է, որ նման դեպքերը կրկնվեն ու հասնեն մինչև մահվան դեպքերի:

Ամեն դեպքում, խմբի ղեկավարը նկատեց, որ բուժսպասարկման ոլորտում պետությունը որոշակի գործողություններ կատարել է, նոր սարքավորումներ են տրամադրվել, կատարվել է որոշակի վերապատրաստում։ Զալյանը միաժամանակ ավելացրեց, որ կա համապատասխան մասնագետների խնդիր:  Ինչ վերաբերում է գերբնակեցման հարցին, ապա նա ասաց, որ «Արմավիր» ՔԿՀ-ի կառուցումից հետո այդ խնդիրը ամբողջովին չի վերացել, քանի որ Նուբարաշենում կա գերբնակեցում և կա դեպք, երբ 8 հոգանոց խցում գտնվում է 15-16 անձ: «Դա այն ոլորտն է, որտեղ խնդիրներն իսպառ վերացնել հնարավոր չէ»,-ասաց նա:

Անդրադառնալով սննդի հետ կապված խնդիրներին, նա օրինակ բերեց, որ մեկ դատապարտյալին հատկացվող 20 գրամ աղը փոխարինվել է 5 գրամով,  և դատապարտյալները դժգոհում են անալի ուտելիքի համար: «Արգելված իրերի շրջանառությունը բոլոր ՔԿՀ-ներում առկա է, յուրաքանչյուր իր արժեքն ունի»,-ասաց նա և նշեց, որ այդ խնդիրը չի բարձրաձայնվում, քանի որ երբեմն այդ վիճակը բխում է դատապարտյալների շահերից: Նա ասաց, որ Դիտորդական խմբի լիազորությունների մասով ևս ոչ մի դրական փոփոխություն չկա:

 tert.am

Տես նաև՝ ankakh.com