ՀՔԱ Վանաձորի գրասենյակը պահանջում է քննություն իրականացնել Տավուշի մարզի դատախազության աշխատակցի մասնակցությամբ տեղի ունեցած միջադեպի ուղղությամբ
16:09, May 25, 2016 | Նորություններ, Սեփական լրատվությունՀելսինկյան քաղաքացիական ասամբլեայի Վանաձորի գրասենյակը Ankax Lragrox անունով օգտատիրոջից ստացել է նամակ, որում ասվում է հետևյալը.
«Բարև Ձեզ: Հայաստանում պետական ապարատի հերթական պաշտոնյայի ոչ վայել արարքը մեր հասարակության ուշադրությանն արժանացնելու և ի վերջո պետական կառավարման ոլորտում պաշտոնատար անձի վարքագծի կարգավորման ուղղությամբ մեր պատասխանատու պաշտոնյաների ամպագոռգոռ հայտարարություններին հակադարձելու համար, որպես օբյեկտիվ լրատվություն լուսաբանող, արդարության և կոռուպցիայի դեմ պայքարող ուժ, Ձեզ հայտնում եմ հետևյալ տեղեկատվությունը՝ հույս ունենալով, որ այն արդարացի և օբյեկտիվ կլուսաբանվի և պատասխանատու պաշտոնյաները ի վերջո «տեղից կշարժվեն»:
Տավուշի մարզի դատախազության աշխատակիցներից մարզի դատախազի տեղակալ Հ.Բաղդասարյանը այնքան է զվարճացել ու ոգելից խմիչք օգտագործել, որ 21.05.2016թ. Իջևան-Դիլիջան ավտոմայրուղուն հարակից գտնվող ռեստորաններից մեկում, որը ճանապարհի կողմից ունի արհեստական լիճ, հարբած վիճակում իր <<Նիսսան տեանա >> մակնիշի 01 OP 077 համարանիշերի ավտոմեքենայով հայտնվել է լճում: Ամոթալին ոչ միայն այն է, որ որպես պաշտոնյա նա հարբած վարում է ավտոմեքենան, այլ այն է, որ դատախազը, լինելով իգական սեռի ներկայացուցիչ, չարաշահում է ալկոհոլ, հրաժարվում օրը ցերեկով դեպքի վայր ժամանած շտապ օգնությանից և ի վերջո սահմանին տիրող լարված իրավիճակում զվարճանում սրա-նրա հետ, իսկ ճանապարհով անցնող բազմաթիվ պատահական անցորդները ծիծաղում էին և միմյանց ասում <<Էս էլ մեր ալկագոլիկ դատախազը, էլ ինչ ասես ես երգրի մասին>>:
Հայտնի են դարձել նաև ուշագրավ այլ մանրամասներ առ այն, որ 21.05.2016 թ. խնջույքը տեղի է ունեցել <<Ոսկե ձկնիկ>> կոչվող նորաբաց ռեստորանում: Տավուշի մարզի դատախազ Ա.Մարուխյանի հրավերով, այսպես ասած <<պատիվ տալու համար>>, Տավուշի մարզ են եկել ՀՀ գլխավոր դատախազության նախաքննության և հետաքննության նկատմամբ հսկողություն իրականացնող վարչության դատախազները, այդ թվում դատախազ Մամիկոն Մարտիրոսյանը, ով լուսանկարում պատկերված է լճում գտնվող ավտոմեքենայի առջևի մասում և փորձում է դուրս բերել ավտոմեքենան լճից: Խնջույքին ներկա են գտնվել նաև ՀՀ գլխավոր դատախազության կոռուպցիայի և ապօրինի անտառհատումների դեմ պայքարի վարչության դատախազները, Տավուշի մարզի դատախազը և նրա տեղակալ Հայկուշ Բաղդասարյանը: Զավեշտալին այն է, որ հյուրասիրությունը կազմակերպել է Իջևանի անտառտնտեսության տնօրեն Սուրեն Մանուկյանը, ով նաև իր ուժերով ու միջոցներով <<Գազ 66>> մակնիշի ավտոմեքենա է կանչել դեպքի վայր, որ մեքենան դուրս հանվի լճից, այնուհետև տնօրենն իր իսկ միջոցներով ներկայումս Իջևանի արհեստավորների մոտ վերանորոգում է լճում հայտնված դատախազի <<Նիսսան Տեանա >> ավտոմեքենան: Այս ամենի արատավոր և կեղտոտ երևույթն այն է, որ ապօրինի անտառհատումների և կոռուպցիայի դեմ պայքարող դատախազները անտառտնտեսության տնօրենի հետ միասին զվարճանում են, որից հետո մեր պաշտոնյաները, այդ թվում՝ գլխավոր դատախազությունը խոսում է կոռուպցիայի դեմ պայքարելու, անտառհատումները բացահայտելու մասին, նամանավանդ, որ պետության ֆինանսական միջոցները սուղ են, իսկ պետական չինովնիկները քեֆ են անում, զվարճանում և միմյանց հետ և նման կերպ <<պայքարում>> անտառհատումների և կոռուպցիայի դեմ: Եվ սա դեռ ամենը չէ, պարզվում է նաև, որ նշված դեպքով որևէ պատկան կառույց չի զբաղվել: Լինելով իգական սեռի ներկայացուցիչ՝ բարձրաստիճան պաշտոնյա, Հայկուշ Բաղդասարյանը մեքենան վարել է հարբած վիճակում, իսկ լուսանկարում կարմիր մայկայով պատկերված ռեստորանի տնօրեն Վահե Ղալումյանը, նրա կողքին գտնվող և լուսանկարում պատկերված Տավուշի մարզի դատախազ Արմեն Մարուխյանը ձեռքները գրպանում դրած հետևում էին, թե ինչպես են մեքենան դուրս բերվում լճից: Հարց է առաջանում, թե ու՞ր են նայում մեր պատկան մարմինները, նույն մարզի դատախազը ինչու՞ է թույլ տալիս, որ իր տեղակալը ոչ սթափ վիճակում վարի մեքենան և ինչու՞ է բարձրաստիճան պաշտոնյան ոչ սթափ վիճակում վարում մեքենան, և այսպե՞ս են դատախազները պայքարում ապօրինի անտառհատումների դեմ՝ անտառտնտեսության տնօրենի կողմից քեֆ կազմակերպելու եղանակով: Առ այսօր որևէ իրավասու մարմին նշված խնդրին չի անդրադառնում, կարծես բոլորը քնած են, սա է մեր դառը իրականությունը, ինչպես ասում են՝ նման անօրեն դատախազներով պայքարում ենք ապօրինությունների դեմ, էլ ի՞նչ պետք է հասարակ քաղաքացին ակնկալի նման պաշտոնյաներից, էլ ինչպե՞ս պետք է հասարակ քաղաքացին հավատա արդարությանը …»
Հելսինկյան քաղաքացիական ասամբլեայի Վանաձորի գրասենյակը պահանջում է ՀՀ Գլխավոր դատախազությունից, որ կատարվի քննություն վերոնշյալ նամակում առկա տեղեկատվության ուղղությամբ, և պատասխանատվության ենթարկվեն հիշյալ պաշտոնատար անձինք:
Լուսանկարները տրամադրվել են Ankax Lragrox օգտատիրոջ կողմից