Դատական դեպարտամենտի ներկայացուցիչը Ժ. Սեֆիլյանի գործով դատական նիստի մասնակիցների անձնական տվյալները ոչնչացնելու ապացույց չներկայացրեց
14:45, August 4, 2018 | Նորություններ, Սեփական լրատվություն
2018 թ. օգոստոսի 3-ին ՀՀ Վարչական դատարանը շարունակեց քննել ՀՀ Դատական դեպարտամենտի դեմ ՀՔԱ Վանաձորի գրասենյակի նախագահ Արթուր Սաքունցի հայցը:
Ժիրայր Սեֆիլյանի և մյուսների գործով 2018 թ. մարտի 2-ին Երևան քաղաքի ընդհանուր իրավասության դատարանի Շենգավիթի նստավայրում նշանակված դատական նիստից առաջ դատական կարգադրիչները, իմանալով, որ Արթուր Սաքունցը մասնակցելու է վերոնշյալ դատական նիստին, խուզարկել են և վերցրել նրա անձնական տվյալները:
Մինչդեռ այլ դատական նիստերի մասնակցող քաղաքացիներին դատական կարգադրիչները չեն խուզարկել:
Դատարան ներկայացված հայցով Ա. Սաքունցը նշել է, որ խուզարկության գործընթացն ակնհայտ նվաստացման միտում է ունեցել, և պահանջել է ոչ իրավաչափ ճանաչել ՀՀ Դատական դեպարտամենտի կարգադրիչների գործողությունները:
Հայցադիմումին կից ներկայացրել է տեսանյութ, որում երևում է, որ դատական կարգադրիչները ակնհայտ խտրական վերաբերմունք են ցուցաբերում՝ անձի պաշտոնից ու կարգավիճակից կախված:
Երեկ կայացած դատական նիստի ընթացքում դատարանը լսեց Ա. Սաքունցի ներկայացուցիչ, ՀՔԱ Վանաձորի գրասենյակի փաստաբան Անի Չատինյանի հայցադիմումի հիմնավորումներն ու հետազոտեց ինչպես հայցվոր կողմի, այնպես էլ պատասխանողի ներկայացրած տեսանյութերը:
Հայցվոր կողմի ներկայացրած տեսանյութում հստակ երևում է, որ կարգադրիչները ընտրողական վերաբերմունք են ցուցաբերում:
Նախորդ դատական նիստին ՀՀ Դատական դեպարտամենտի ներկայացուցիչը ևս չժխտեց, որ միայն ժիրայր Սեֆիլյանի գործով դատական նիստի մասնակիցների անձնական տվյալներն են վերցրել:
Պատասխանողի տեսանյութը ներկայացնում էր դատական նիստի ընթացքը, թե ինչպիսի վարքագիծ են դրսևորում նիստի մասնակիցները՝ ծափահարում, վանկարկումներ անում և այլն: Այս տեսանյութը դատարան ներկայացնելու՝ պատասխանողի հիմնավորումն այն էր, որ տեսանյութում երևում է, որ նիստի մասնակիցները ոչ սովորական վարքագիծ են դրսևորում և դրանով է պայմանավորված նրանց խուզարկելն ու անձնական տվյալները վերցնելը:
Իսկ հայցադիմումի առնչությամբ ՀՀ Դատական դեպարտամենտը իր դիրքորոշումը հայտնել էր ավելի վաղ՝ հայցադիմումի պատասխանով, որին էլ պատասխանողը հղում տվեց դատարանում:
ՀՀ Դատական դեպարտամենտը օրինական է համարել կարգադրիչների գործողությունները, նշել, որ վերջիններս իրավասու են դատական նիստերի դահլիճ մուտք գործող անձանց և նրանց իրերը զննելու, ինչպես նաև՝ ստուգելու անձի ինքնությունը: Եվ որ նրանց այդ գործողությունները միտված են պահպանելու դատարանում գտնվող անձանց անվտանգությունն ու հասարակական կարգը:
Ինչպես հայցադիմումի պատասխանում, այնպես էլ նախորդ դատական նիստին ՀՀ դատական դեպարտամենտի ներկայացուցիչը հայտարարել էր, որ անձնագրային տվյալները դատական նիստից հետո ոչնչացվում են: Դատարանն էլ պահանջել էր ապացույց ներկայացնել դրա մասին: Այս դատական նիստին պատասխանողը կրկին հղում կատարեց հայցադիմումի պատասխանին, բայց անձնագրային տվյալները ոչնչացնելու վերաբերյալ որևէ փաստ չներկայացրեց:
Դատական նիստից հետո Ա. Սաքունցի ներկայացուցիչը փաստում է, որ Սաքունցի նկատմամբ, այո, դրսևորվել է ակնհայտ խտրական և նվաստացնող մոտեցում, խուզարկություն կատարելու գործողությունը նվաստացնող է եղել նրա համար և ինքն իր աչքերում նվաստացել է:
Այսօր արդեն մի բան հստակ է. Ժ. Սեֆիլյանի և մյուսների գործով նիստերին մասնակցող անձանց անձնագրային տվյալները հավաքագրելը, նրանց խուզարկելը նաև կրել է պատժիչ բնույթ, ամեն կերպ փորձ է արվել համակիրներին զերծ պահել դռնբաց դատական նիստին մասնակցելուց:
Հաջորդ դատական նիստին, որը նշանակվեց 2018 թ. օգոստոսի 20-ին՝ ժամը 12:50-ին, դատարանը վճիռ կկայացնի: