ՀՔԱ Վանաձորի գրասենյակն ընդդեմ ՀՀ պաշտպանության նախարարության. Դատարանը բավարարեց կազմակերպության հայցը
16:48, April 9, 2014 | Նորություններ, Սեփական լրատվություն | Զինված ուժեր2014 թ. ապրիլի 9-ին ՀՀ վարչական դատարանի դատավոր Ա. Սարգսյանի կողմից հրապարակվեց ՀՀ պաշտպանության նախարարության դեմ ՀՔԱ Վանաձորի գրասենյակի ներկայացրած հայցադիմումի վերաբերյալ կայացված որոշումը, որով բավարարվեց գրասենյակի հայցը: Մասնավորապես, դատարանը պարտավորեցրեց ՀՀ պաշտպանության նախարարությանը տրամադրել կազմակերպության տեղեկատվության հարցմամբ պահանջված տեղեկատվությունը և հօգուտ կազմակերպության բռնագանձել 8.000 ՀՀ դրամ՝ որպես վճարված պետական տուրքի գումար: Այսպիսով, մեկ ամսյա ժամկետում որոշումը ՀՀ վարչական վերաքննիչ դատարան չբողոքարկվելու և օրինական ուժի մեջ մտնելու դեպքում ՀՀ պաշտպանության նախարարությունը պարտավոր է կազմակերպությանը տրամադրել սնունդ, հագուստ, վառելիք և գրենական պիտույքներ մատակարարող կազմակերպությունների անվանումները և նրանց կողմից մատակարարվող սննդի, հագուսի, վառելիքի և գրենական պիտույքների տեսակները:
Հիշեցնենք, որ ՀՔԱ Վանաձորի գրասենյակը սույն գործով հայցադիմում էր ներկայացրել դատարան դեռևս 2010 թվականին, իսկ այնուհետև խնդրել էր կասեցնել գործի վարույթը՝ մինչև մեկ այլ գործով ՀՀ Սահմանադրական դատարանի կողմից որոշում կայացնելը: ՀՀ Սահմանադրական դատարանը 06.03.2012թ. N 1010 որոշմամբ «Պետական և ծառայողական գաղտնիքի մասին» Հայաստանի Հանրապետության օրենքի 12-րդ հոդվածի 7-րդ մասի` «Գերատեսչական ցանկերը գաղտնագրվում են և հրապարակման ենթակա չեն» դրույթը` այնքանով, որքանով չի վերաբերում գաղտնագրման ենթակա կոնկրետ տեղեկության, ճանաչել է ՀՀ Սահմանադրության 27-րդ և 43-րդ հոդվածների պահանջներին հակասող և անվավեր:
Այսպիսով, արձանագրում ենք, որ դատարանի նման որոշումը ևս մեկ քայլ է դեպի արդարադատության՝ անկախ, անկողմնակալ և օբյեկտիվ համակարգի ձևավորմանն ու ամրապնդմանը, որն էլ հանդիսանում է ՀՔԱ Վանաձորի գրասենյակի գործունեության հիմնական նպատակներից մեկը:
Դատարանի կողմից կայացված որոշման հիմնավորումները և որոշումն ամբողջությամբ կներկայացնենք այն ստանալուց հետո: