ՀՀ քրեակատարողական հիմնարկների գերբեռնվածությունը բազմաթիվ խնդիրներ է հարուցում
05:47, April 19, 2013 | Նորություններ | Քրեակատարողական հիմնարկներՀելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը պարբերաբար բարձրաձայնել է քրեակատարողական հիմնարկների ծանրաբեռնվածության, տարրական պայմանների բացակայության խնդիրները: ԳԱԼԱ-ի հետ զրույցում նա նշեց. «Ոչ իրավական մեխանիզմները քանի դեռ գերակա նշանակություն ունեն խնդիրների լուծման տեսակետից, քրեակատարողական հիմնարկներում վիճակը, ցավոք սրտի, կմնա նույնը»:
Քրեակատարողական հիմնարկների գերբեռնվածությունը բազմաթիվ խնդիրներ է հարուցում: Խոսքը չի վերաբերում բոլոր հիմնարկներին, բայց գերակշիռ հատվածում կա այդ պրոբլեմը: Արթուր Սաքունցը կարծում է, որ հենց այստեղ է պետք փնտրել այն հարցի պատասխանը, թե քրեակատարողականներում ինչու՞ է աճել մահացության ցուցանիշը: «Մենք դա կապում ենք գերբեռնվածության հետ: Գերբեռնվածությունը դա զուտ ֆիզիկական խնդիրը չէ, որ, ասենք, 8 տեղանոց խցում 16, 18 մինչեւ 20 հոգի են տեղավորում: Խնդիրը մենակ դա չէ, որ կենսական տարածքն է անբավարար: Խնդիրն այն է, որ հիմնարկի անձնակազմը դատապարտյալների թվի համեմատ չի աճում: Այսինքն՝ սպասարկման ծառայության ապահովման, իրավունքների ապահովման համար անձնակազմն արդեն սահմանափակ է»:
Գերբեռնվածության պարագայում շատ հարցեր դառնում են խնդրահարույց՝ բուժ.սպասարկում, զբոսանք, հեռախոսային խոսակցություն, լոգանք եւ այլն: «Լոգարանն, ասենք, նախատեսված է 8 հոգու համար, ո՞նց կարող է 20 հոգու համար լիարժեք սպասարկի այն նորմաներով, որը սահմանված է»:
Այս տեսանկյունից շատ ավելի բարդ է բժշկական ծառայության հարցը:
«Կա նաեւ ինստիտուցիոնալ բնույթի հարց: Նույն դատապարտյալների հիվանդանոցը, որը պետք է այնպիսի բժշկական ծառայություն իրականացնի, որը հնարավոր չէ իրականացնել քրեակատարողական հիմնարկում: Բայց դատապարտյալների հիվանդանոցը նախատեսված է միայն տղամարդկանց համար՝ կանանց բաժանմունք չունի, չունի նաեւ անչափահասների համար նախատեսված բաժանմունք: Սա ես կարծում եմ, որ լուրջ մարտահրավեր է «Աբովյան» ՔԿՀ-ում գտնվող ազատազրկված անձանց իրավունքների տեսակետից: Ի դեպ, որոշ դեպքերում դատապարտյալների հիվանդանոց տեղափոխումն էլ է պրոբլեմ, որովհետեւ սուբյեկտիվ մոտեցումները բավականին գերակշիռ են, ընթացակարգերը հստակ չեն: Քրեակատարողական վարչության պետի տեղակալն է որոշելու՝ ի՞նչ ժամանակներում տանել, թե՞ չտանել»:
Այս բոլոր խնդիրների վերաբերյալ առանձին դեպքերում, ըստ Արթուր Սաքունցի, հայտարարություններ հնչում են, բայց ընդհանուր առմամբ, համակարգը համարժեք չի արձագանքում. «Վերջին հաշվով մարդու նկատմամբ, մարդկային արժանապատվության նկատմամբ հարգանքը պետք է գերակա լինի՝ մնացած բոլոր գործոններից, որը ցավոք սրտի, մենք արձանագրում ենք, որ չկա»,- եզրափակեց մեր զրուցակիցը:
Աղբյուրը՝ http://topnews.mediamall.am/?id=26019