0 8000 12 11

Ինչպես արդեն տեղեկացրել ենք, «Հիմնադիր խորհրդարանի» անդամ (Լոռու մարզի համակարգող) Հովհաննես Ղազարյանին պատկանող բնակարանում և նրա տիրապետության տակ գտնվող գրասենյակում 2015 թ. ապրիլի 7-ին կատարվել են խուզարկություններ, ինչից հետո վերջինս, առանց իրավական հիմքի, բերման է ենթարկվել ՀՀ ՀԿԳ Վարչություն՝ վկայի կարգավիճակով, որտեղ մնացել է 11 ժամ:

Նույն օրը նման խուզարկություններ են կատարվել «Հիմնադիր խորհրդարանի» մյուս անդամների նկատմամբ ևս, ինչը հիմք է տալիս ենթադրելու, որ վերոնշյալ անձանց, այդ թվում՝ Հովհ.Ղազարյանի նկատմամբ, իրականացվել է քաղաքական հետապնդում:

Հովհաննես Ղազարյանի իրավունքների պաշտպանության նպատակով Հելսինկյան քաղաքացիական ասամբլեայի Վանաձորի գրասենյակի կողմից ներգրավվել են փաստաբաններ Ա. Հարությունյանը և Ա. Սուքիասյանը:

Խուզարկության ընթացքում ապօրինաբար առգրավված իրերը վերադարձնելու, ինչպես նաև խուզարկություն կատարելու թույլտվության մասին դատարանի որոշումների պատճենները տրամադրելու պահանջով դիմում է ներկայացվել ՀԿԳ Քննչական վարչություն: ՀԿԳ Քննչական վարչությունը, սակայն, մերժել է ներկայացված դիմումը՝ պատճառաբանելով, որ վկայի դատավարական կարգավիճակ ունեցող քրեական դատավարության մասնակիցը ՀՀ Քրեական դատավարության օրենսգրքով նման իրավունք չունի:

Սույն գործով 2015 թ. մայիսի 13-ին ՀՀ Գլխավոր դատախազություն ներկայացված դիմում-բողոքը ևս մերժվել է, որից հետո բողոք է ներկայացվել Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարան: Դատարանը բողոքը բավարարել է մասնակիորեն` Հովհ. Ղազարյանին հնարավորություն ընձեռնելով՝ օգտվելու կասկածյալի կամ մեղադրյալի իրավունքներից, այն է՝ ծանոթանալ իր մասնակցությամբ իրականացված քննչական և այլ դատավարական գործողությունների արձանագրություններին և պատճենահանել դրանք, ինչպես նաև ցուցում է տրվել՝ 2015թ.-ի մայիսի 13-ի դիմում-բողոքի վերաբերյալ որոշում կայացնելու:
Դատարանի կողմից մերժվել են 2015թ. ապրիլի 4-ին Հովհ. Ղազարյանի բնակարանում և գրասենյակում կատարված խուզարկության ընթացքում թույլ տրված իրավունքների խախտումների փաստացի ճանաչման և առգրավված իրերի վերադարձման պահանջները, որոնց մասով ներկայացվել է վերաքննիչ բողոք:

2015 թ. հոկտեմբերի 19-ին Վերաքննիչ քրեական դատարանը մերժել է այն:

ՀՀ Վերաքննիչ քրեական դատարանի 2015 թ.-ի հոկտեմբերի 19-ի վերոնշյալ որոշման դեմ Հովհ. Ղազարյանի ներկայացուցիչ Արթուր Սուքիասյանի կողմից 2015 թ. նոյեմբերի 14-ին ներկայացվել է վճռաբեկ բողոք: