0 8000 12 11

2016 թ. հոկտեմբերի 18-ին, ՀՀ Վարչական դատարանում, նախագահությամբ դատավոր՝ Կ. Զարիկյանի, կայացավ «Հայ կանանց ճակատի» անդամ Սուսաննա Սիմոնյանի դեմ ՀՀ Ոստիկանության ներկայացրած հայցադիմումի քննությունը, որով պահանջվել է Ս. Սիմոնյանին վարչական պատասխանատվության ենթարկել ՀՀ Վարչական իրավախախտումների վերաբերյալ օրենսգրքի 172.3-րդ հոդվածով (ոստիկանության ծառայողին կամ զինծառայողին վիրավորելու համար):

Դատական նիստը կայացավ ՀՀ Ոստիկանության ներկայացուցիչ, ՀՀ Ոստիկանության Երևան քաղաքի վարչության Քանաքեռ-Զեյթունի բաժնի ավագ իրավախորհրդատու Ռուբեն Եպիսկոպոսյանի, պատասխանող Սուսաննա Սիմոնյանի և վերջինիս ներկայացուցիչ, ՀՔԱ Վանաձորի գրասենյակի Երևանի ներկայացուցչության իրավաբան Տաթևիկ Սիրադեղյանի մասնակցությամբ:

Դատական նիստի ընթացքում դատարանը պարզեց միջնորդությունների բացակայության հարցը, որից հետո անցավ պատասխանողի կողմից նախապես ներկայացված միջնորդության քննարկմանը: Ս. Սիմոնյանի ներկայացուցիչ Տ. Սիրադեղյանը նշեց, որ ՀՀ Վարչական իրավախախտումների վերաբերյալ օրենսգրքի 172.3-րդ հոդվածը չի սահմանում վիրավորանք հասկացության բացատրությունը, իսկ ՀՀ Քաղաքացիական օրենսգրքի համապատասխան դրույթները վարչական հարաբերություններում չեն կարող կիրառվել: Տ. Սիրադեղյանը հղում կատարեց ՀՀ Վճռաբեկ և ՀՀ Սահմանադրական դատարանի որոշումներում արտահայտված իրավական դիրքորոշումներին, ինչպես նաև ՀՀ Սահմանադրության 79-րդ հոդվածին, որի համաձայն՝ «Հիմնական իրավունքները և ազատությունները սահմանափակելիս օրենքները պետք է սահմանեն այդ սահմանափակումների հիմքերը և ծավալը, լինեն բավարար չափով որոշակի, որպեսզի այդ իրավունքների և ազատությունների կրողները և հասցեատերերն ի վիճակի լինեն դրսևորելու համապատասխան վարքագիծ»:

Նշելով, որ ՀՀ Վարչական իրավախախտումների վերաբերյալ օրենսգրքի 172.3-րդ հոդվածը հակասում է ՀՀ Սահմանադրության 79-րդ հոդվածին՝ Տ. Սիրադեղյանը միջնորդեց կասեցնել գործի վարույթը և ՀՀ Սահմանադրության 101-րդ հոդվածի 7-րդ կետի ու «Սահմանադրական դատարանի մասին» ՀՀ օրենքի 71-րդ հոդվածի կարգով դիմել ՀՀ Սահմանադրական դատարան՝ ՀՀ Վարչական իրավախախտումների վերաբերյալ օրենսգրքի 172.3-րդ հոդվածի՝ ՀՀ Սահմանադրության 79-րդ հոդվածին համապատասխանության հարցը որոշելու համար:

Դատարանը միջնորդության վերաբերյալ որոշ հարցեր ուղղեց պատասխանողի ներկայացուցչին, մասնավորապես՝ փորձեց հստակեցնել, թե ըստ կողմի՝ առկա է օրենքի բաց, թե հակասահմանադրական հոդված, ինչին ի պատասխան՝ Տ. Սիրադեղյանը նշեց, որ ՀՀ Վարչական իրավախախտումների վերաբերյալ օրենսգրքի 172.3-րդ հոդվածը հնարավորություն չի տալիս հասկանալու, թե ինչպիսի արտահայտությունը կամ գործողությունը կարող է դիտարկվել որպես վիրավորանք, և այդ պայմաններում Ս. Սիմոնյանը չէր կարող իր վարքագիծը համապատասխանեցնել նշված հոդվածի պահանջներին: Բացի դրանից՝ ՀՀ Քաղաքացիական օրենսգրքի դրույթները կիրառելի կլինեին միայն այն դեպքում, երբ դրա վերաբերյալ ՀՀ Վարչական իրավախախտումների վերաբերյալ օրենսգիրքը համապատասխան դրույթ պարունակեր:

Միջնորդությամբ հղում կատարված ՀՀ Քաղաքացիական օրենսգրքի 1-ին հոդվածի 6-րդ մասի առնչությամբ Տ. Սիրադեղյանը նշեց, որ ՀՀ Քաղաքացիական օրենսգիրքը կարգավորում է քաղաքացիաիրավական հարաբերությունները, և անձն, ում հասցեագրված է վիրավորանք, կարող է պատճառված վնասի փոխհատուցման համար դիմել ընդհանուր իրավասության դատարան: Միաժամանակ, դատարանի հարցին ի պատասխան, պատասխանողի ներկայացուցիչը նշեց, որ ոստիկանին վիրավորելը քաղաքացուն հասցված վիրավորանքից տարբերվում է այնքանով, որքանով դրա դեպքում ՀՀ Վարչական իրավախախտումների վերաբերյալ օրենսգիրքն առաջացնում է վարչական պատասխանատվություն:

ՀՀ Ոստիկանության ներկայացուցիչը, առարկելով ներկայացված միջնորդության դեմ, դատարանի հարցին ի պատասխան հայտնեց, որ միանշանակ պարզ է, թե ինչ է նշանակում վիրավորանքը և նշեց, որ դա նույնն է, ինչ նախատեսված է ՀՀ Քաղաքացիական օրենսգրքով:

Դատարանը, քննարկելով միջնորդությունը, նախ արձանագրեց, որ գործի վարույթը կասեցնելը և ՀՀ Սահմանադրական դատարան դիմելը դատարանի լիազորությունն է, որը դատարանը կիրառում է այն պահին, երբ դատարանի մոտ դիրքորոշում է ձևավորվում կիրառելի իրավական նորմի հակասահմանադրականության վերաբերյալ, իսկ տվյալ դեպքում դա կողմի դիրքորոշումն է, հետևաբար՝ այս պահին գործի վարույթը կասեցնելու և ՀՀ Սահմանադրական դատարան դիմելու հիմք Դատարանը դեռ չի տեսնում, ապա նշեց, որ համապատասխան որոշում կարող է կայացվել գործի քննության ընթացքում Դատարանի մոտ նման համոզմունք ձևավորվելու դեպքում:

Այնուհետև Տ. Սիրադեղյանը, վկայակոչելով ՀՀ Սահմանադրական դատարանի այն որոշումը, որով մինչև դատաքննության անցնելը հակընդդեմ հայց ներկայացնելու վերաբերյալ ՀՀ Վարչական դատավարության օրենսգրքի դրույթը ճանաչվել է Սահմանադրությանը հակասող, դիրքորոշում հայտնեց, որ Ս. Սիմոնյանը կարող է ՀՀ Ոստիկանության գործողությունները ոչ իրավաչափ ճանաչելու պահանջով հակընդդեմ հայց ներկայացնել նաև դատաքննության փուլում:

Հակընդդեմ հայցադիմումի ընդունելության վերաբերյալ սահմանված ժամկետում համապատասխան որոշում կայացնելու նպատակով դատական նիստը հետաձգվեց:

Սույն գործով հաջորդ դատական նիստի օրվա և ժամի մասին կողմերը կծանուցվեն գրավոր:

Տես նաև՝ armlur.am